OÉ-CUSSE, 28 fevereiru 2024 (TATOLI) – Jornalista Rádiu Televizaun Timor-Leste, Empreza Públika (RTTL,EP), Paulino Marques, hetan fiar hosi Autoridade Rejiaun Administrativa Espesiál Oé-Cusse Ambeno (RAEO), nu’udar jestór hodi lidera sub-rejiaun Pássabe ho mandatu tinan lima (2024-2028).
Nia hala’o profisaun iha mundu jornalizmu iha mídia estatál RTTL, EP iha Rejiaun Oé-Cusse, hodi tatoli povu Oé-Cusse nia lian liuhosi Rádiu Timor-Leste nian dezde 2001 to’o 2024.
Hosi jornalista, nia hakbesik-an ba povu, koñese povu nia halerik, promove dezenvolvimentu sira seluk iha Oé-Cusse, maibé iha tinan ne’e 2024, iha ona podér hodi responde povu nia preokupasaun, tanba hetan ona fiar hosi Autoridade RAEOA hodi lidera sub-rejiaun Pássabe ba mandatu tinan lima.
“Ha’u hatene, Autoridade fiar ha’u, atu sai jestór iha Pássabe, maibé ha’u seidauk bele ko’alia ba públiku,” Paulino Marques, ba Agência Tatoli liuhosi telefónika, iha Oé-Cusse, kuarta ne’e.
Notísia relevante: Autoridade RAEOA prioriza infraestrtura bázika ba sub-rejiaun Pássabe
Dokumentu ofisiál ne’ebé Agência Tatoli asesu liuhosi Sekretariu Rejionál ba Asuntu Administrasaun, katak lista nomeisaun ba jestór sub-rejiaun haat ne’e despaxu hosi Prezidente Autoridade RAEOA, Rogério Tiago Lobato.
Jestór sira maka hanesan, jestór sub-rejiaun Pássabe Paulino Marques, troka jestór sesante Anton Ulan, jestór sub-rejiaun Nítibe Agustinho Afulit troka jestór sesante Teodoro Sila.
Nune’e mós jestór sub-rejiaun Oésilo Benedito Ulan troka jestór sesante Domingos Marques, no jestór sub-rejiaun Pante Makasar, Lorênço da Cunha troka jestór sesante Eurico da Costa Bobo.
Notísia relevante:Autoridade RAEOA prioriza asuntu estabelesimentu suku foun iha Oé-Cusse
Sekretáriu Rejionál ba Asuntu Administrasaun, Andre La’o, hateten, lista ne’e nomesaun ne’e, hetan ona aprovasaun no públika ona iha Jornál Repúblika.
Nune’e ajenda ba tomada pose sei konsentra iha kada sub-rejiaun sei akontese iha fulan-marsu 2024 ne’e.
“Ha’u simu ona lista nomeisaun iha ha’u-nia liman, maibé ha’u ajenda ona, liuliu jestór sub-rejiaun sira na’in-haat, sira idak-idak mai hosi sira-nia sub-rejiaun rasik, tenke simu pose iha idak-idak nia fatin, atu hetan akompañamentu hosi povu rasik,” Andre La’o ba jornalista sira iha Oé-Cusse, tersa ne’e.
“Ha’u lakohi tomada pose hamutuk ho diresaun sira iha sentrál ne’e, depois komunidade sira iha baze la hatene, bainhira ita haruka jestór ba, sira la hatene, entaun ita hakarak transparánsia ba publiku katak, programa Governu ne’e, ita tenke desentraliza ba to’o sub-rejiaun suku no aldeia.”
Jornalista Paulino Marques oras ne’e prepara hela karta rejignasaun atu hato’o ba RTTL.
Jornalista: Abílio Elo Nini
Editór: Evaristo Soares Martins
