OÉ-CUSSE 04 agostu 2023 (TATOLI) – Autoridade Rejiaun Administrativa Espesiál Oé-Cusse Ambeno (RAEOA), Arsénio Paixão Bano, promete polítika autoridade tau priodade ba komunidade sira iha sub-rejiaun Pássabe liuliu ba infraestrutura bázika.
“Sub-rejiaun Pássabe Autoridade fó prioridade, ita hakarak estrada asesu hosi Pássabe ne’e, nia zona sentrál di’ak asesu ba sub-rejiaun Pássabe ho Oésilo no Pante Makasar tenke di’ak, tanba sei estrada prinsipál sira-ne’e iha sub-rejionál di’ak, ita tama ona ba estrada urbana Pássabe, ha’u hakarak estrada urbana Pássabe tenki di’ak,” Arsénio Bano, ko’alia iha suku Malelat hafoin hala’o fiskalizasaun ba projetu reabilitasaun estrada rurál sira iha Pássabe, kuarta ne’e.
Notísia relevante: Kompañia Am-Lhichoe reabilita estrada rurál Pássabe to’o ona 10%
Tuir Arsénio Bano katak, tanba saida mak Autoridade RAEOA tau interese, tanba iha sub-rejiaun Pássabe poténsia produtu lokál barak tantu bailoron no tempu udan tanba rai malirin.
“Tan ne’e iha tinan rua ne’e, autoridade foka barak estrada sira iha Pássabe, loke Malelat ba Kusi, no Kusi sa’e ba Mahata liga Nítibe, suku Lela-Ufe, entaun, tinan ne’e agora ita loke ona hosi Pune mai Ban-Afi no mós Nítibe, tanba ponte Noetoko, ne’e estrada Ban-Afi Pune no ponte Noetoko, ne’e tanba ita iha objetivu prinsipál ida, katak asesu dahuluk ba estrada ne’e, entre sub-rejionál iha RAEOA ne’e tenke di’ak,” nia promete.
Nia hatutan, ba asesu daruak, estrada rurál sira-ne’e prioridade ba komunidade Pássabe, ne’e tenke iha, tanba ne’e maka projetu estrada hira-kedan, autoridade halo iha Pássabe, sei falta-tán servisu barak tenke halo, hanesan bee-moos, postu saúde, merkadu tradisionál no eskola.
“Sira-ne’e sedauk, ita-nia servisu sei barak, ita hahú uluk maka estrada sira, bainhira komunidade asesu mak ita foin hadi’a setór sira seluk, tanba iha Pássabe suku rua de’it, Abani ho Malelat, maibé susar tebes asesu ba zona sentrál Pante Makasar,” nia katak.
Xefe suku Malelat hosi sub-rejiaun Pássabe, José Marques, agradese ba Autoridade RAEOA, tanba dezde mandatu Prezidente Autoridade dahuluk to’o atuál, komunidade foin asesu estrada hodi liga ba Pássabe vila no Pante Makasar.
“Ha’u orgullu ba programa ne’ebé Prezidente Autoridade nia polítika atu hadi’a dalan, suku Malelat, dezde uluk mai to’o Prezidente Autoridade primeiru, iha tinan kotuk mak foin loke, ida-ne’e ami orgullu tanba fasilíta tebes ami oinsa bele asesu estrada ho di’ak hosi Pássabe ba Pante Makasar, no hosi Malelat ba Pássabe sentru,” nia orgullu.
Notísia relevante: PA RAEOA xamada kompañia rua loron 60 tenke finaliza estrada rurál Pássabe
Jornalista: Abílio Elo Nini
Editor: Evaristo Soares Martins
