iklan

EKONOMIA, HEADLINE, MUNISÍPIU, OÉ-CUSSE (RAEOA)

Kompañia Am-Lhichoe reabilita estrada rurál Pássabe to’o ona 10%

Kompañia Am-Lhichoe reabilita estrada rurál Pássabe to’o ona 10%

Prezidente Autoridade RAEOA fiskaliza projetu reabilitasaun estrada rurál iha sub-rejiaun Pássabe. Imajen Tatoli/ Abílio Elo Nini.

OÉ-CUSSE 03 agostu 2023 (TATOLI) – Prezidente Autoridade Rejiaun Administrativa Espesiál Oé-Cusse Ambeno (RAEOA), Arsénio Paixão Bano, kontente tanba foin fulan ida de’it, reaabilitasaun estrada rurál iha sub-rejiaun Pássabe, ne’ebé reabilita hosi kompañia Am-Lhichoe Unipesoál Lda atinje ona 10%.

“Ohin ami mai haree nia progresu fiziku sira, ha’u haree progresu ne’e di’ak tebes, foin fulan ida ita haree ona 10% ba lote 2 ho lote 3 atinje 5% liu, ita haree cutting ba foho no preparativu estrada sira la’o maka’as tebes, hanesan prezidente reprezenta autoridade RAEOA ha’u kontenti haree progresu sira-ne’e,” Arsénio Bano ba Tatoli, hafoin hala’o fiskalizasaun iha suku Malelat, sub-rejiaun Pássabe, kuarta ne’e.

Notísia relevante: Autoridade RAEOA hatuur fatuk dahuluk reabilita estrada rurál ba sub-rejiaun tolu

Durante fiskalizasuan ne’e, akompaña mós hosi Sekretáriu Rejionál ba Asuntu Terra Propriedade no tékniku sira hosi Diresaun Rejionál Infraestrtura.

Iha biban ne’e, ezekutivu ne’e, enkoraja kompañia hamutuk ho ekipa, kontinua presta servisu, maske kompañia lokál ida maibé foin fulan ida de’it bele hahú hala’o ona servisu lubun.

“Tanba ne’e ha’u ohin mai, haree kuandu iha lote 3 no lote 2, kompañia Am-Lhichoe, halo ne’e kuandu la’o maka’as, ha’u kontente tanba ne’e kompañia lokál rejiaun nian, halo servisu sira-ne’e maka’as la’o di’ak tebes iha fulan ida nia laran de’it,” nia katak.

“Ha’u fiar katak, fulan setembru kuandu ami mai fali haree, progresu ne’e bele oin seluk, ha’u mós kontenti, rona katak komunidade iha Pássabe ne’e, sira mós kolabora fó rai servisu hamutuk ho kompañia xefe suku aldeia no katuas lia-na’in sira no jestór, sira servisu di’ak ho kompañia, entaun servisu la’o di’ak tebes,” nia katak.

Diretór kompañia Am-Lhichoe Unipesoál Lda, Eurico da Rosa, esplika, loloos progresu liu ona 20% maibé tanba orsamentu kabe ba bazea Bill of Quantity  (BoQ) ho valór ki’ik, nune’e esforsa hosi kompañia hahú uluk ho cutingan.

“Ohin ita observa, item ne’ebé hahú la’o daudaun ona mak ita halo ateru no cutingan, nia progresu foin atinje hanesan ne’e, maske cutingan maka’as, ne’e tanba liga ho nia orsamentu, tanba iha BoQ ki’ik, entaun progresu ne’e bele atinje 20% liu, maibé tanba nia bobot ne’e ki’ik, entaun ita esforsa ona halo cutingan ne’ebé, progresu atuál iha lote 2 atinje 5% no lote 3 atinje 10%,” nia katak.

Notísia relevante: Empreza Am-Lhichoe finaliza ona projetu reabilitasaun estrada rurál iha Nítibe

Diretór kompañia ne’e agradese tanba durante ne’e iha kolaborasaun di’akho komunidade, nune’e kompañia sei esforsa hodi konlui iha tinan ida bazea kontratu, ne’eb’e propoin ona iha dokumentu termu kontratu.

“Ami agradese tebes tanba maioria komunidade iha Pássabe kontribui tebes, katak sira-mós iha komitmentu bo’ot atu simu dezenvolvimentu iha suku no aldeia, entaun komunidade sira rasik mós servisu hamutuk ho kompañia, la kestiona, maibé sira-nia hakarak maka estrada ne’e tenki di’ak hodi utiliza liu-liu lori produtu asesu merkadu iha tempu udan,” nia orgullu.

Entretantu, Kompaña Am-Lhichoe Unipesoál Lda reabilita iha sub-rejiaun Pássabe hahú hosi suku Abani to’o suku Malelat, (STA 5+200-STA 7+600) ho valór kontratu hamutuk  $491,895.57

Nune’e mós kontinua reabilita tán estrada rurál inklui ponte sira iha iha sub-rejiaun Pássabe hahú hosi suku Abani to’o suku Malelat, (3+000-STA 5+200) ho valór kontratu hamutuk $622,244.44, orsamentu hirak-ne’e Autoridade RAEOA aloka hosi Orsamentu Jerál Estadu (OJE) 2023, no durasaun servisu ba projetu rua ne’e durante tinan ida,

Notísia relevante: Estrada difikulta komunidade Maunaebeno faan produtu iha merkadu

Jornalista: Abílio Elo Nini

Editór: Evaristo Soares Martins

iklan
iklan

Leave a Reply

iklan
error: Content is protected !!