Autoridade RAEOA hatuur fatuk dahuluk reabilita estrada rurál ba sub-rejiaun tolu
OÉ-CUSSE, 28 juñu 2023 (TATOLI) – Autoridade Rejiaun Administrativa Espesiál Oé-Cusse Ambeno (RAEOA), kuarta ne’e hatuur fatuk dahuluk ba projetu reabilitasaun estrada rurál inklui ponte sira pertense ba sub-rejiaun Oésilo, Pássabe no sub-rejiaun Nítibe.
Seremónia hatuur fatuk dahuluk ne’e, realiza iha aldeia Neofmetan, suku Ban-Afi, sub-rejiaun Nítibe.
Notísia relevante: RAEOA aloka millaun $1-resin manutensaun estrada no ponte sub-rejiaun tolu
Prezidente Autoridade RAEOA, Arsénio Paixão Bano, hateten, lansamentu ba projetu tolu importante iha sub-rejionál tolu atu asesu ba estrada, tanba antes ne’e konstrui ona ponte rua Bitopa no Noetoko.
“Projetu tolu ne’e nia objetivu atu liga Oésilo ho Nítibe tanba ita halo ona ponte Noetoko inklui ponte ki’ik rua iha aldeia Neofmetan liga ba suku Ban-Afi no Lela-Ufe, depois ohin ita lansa estrada rurál rua iha sub-rejiaun Pássabe iha suku Abani no Malelat inklui Oésilo, suku Usitaqueno faze dahuluk nian, estrada tolu ohin ita lansa, kompañia rua mak sei ezekuta tuir prosesu aprovizionamentu, ita gasta orsamentu ba tinan 2023 bazea planu RAEOA nian besik millaun $2,” Arsénio Bano, ba jornalista sira iha suku Ban-Afi.
Ezekutivu ne’e informa, iha fulan juñu, autoridade RAEOA sei lansa sei lansa tán projetu estrada rurál rua, primeiru hosi ponte Bitopa suku Usitasa’e, liga ba Oébaha, suku Bobometo tanba iha ona ponte ida.
Daruak, estrada rurál hosi Roti suku Lalisuk liga ba Oélkaem, suku Taiboko, hanesan faze primeiru tanba tuir planu sei mellora to’o Nitibe sentru.
Notísia relevante: Empreza Am-Lhichoe finaliza ona projetu reabilitasaun estrada rurál iha Nítibe
Iha ámbitu hatuur fatuk dahuluk ne’e, Prezidente Autoridade RAEOA, husik hela mensajén rua, hodi husu kompañia sira presiza kumpri kontratu no garante kualidade no husu mós komunidade sira atu serbisu hamutuk ho kompañia iha prosesu konstrusaun.
“Primeiru ba kompañia tanba sira priénse kritériu sai manán-na’in, Autoridade nia hakarak servisu ne’e tenke la’o nafatin bazea termu kontratu Bill of Kuantity (BoQ) ba espesifikasaun sira, ita husu Obra Públika sei halo fiskalizasaun, nune’e projetu ne’e bele la’o tuir nia tempu ho kualidade,” nia fó hanoin.
Daruak, husu komunidade atu koopera servisu hamutuk ho kompañia, tanba estrada ne’e halo ba Oé-Cusse.
Jestór sub-rejiaun Nítibe, Teodoro Sila, reprezenta jestór sub-rejiaun Oésilo no Pássabe orgulllu no agradese ba Autoridade RAEOA tanba konstrusaun estrada rurál ne’e sei fasilita komunidade hodi asesu estrada ho di’ak.
“Ohin ita marka-tán istória foun ida, orgullu ba autoridade RAEOA atu fó benefísiu ida-ne’e atu hetan asesu ba estrada iha suku sira-ne’ebé pertense ba Oésilo, Nítibe no Pássabe. Ha’u reprezenta jestór na’in-tolu ami hato’o agradese tanba ida-ne’e fó benefísiu ba futuru liuliu ba komunidade atu asesu tanba ami besikliu fronteira, persiza hadi’a,” nia orgullu.
Xefe suku Malelat hosi sub-rejiaun Pássabe, José Marques, orgullu ba programa ne’ebé Prezidente Autoridade nia polítika atu hadi’a dalan.
Entretantu, kompañia rua ne’ebé manán atu reabilita estrada rurál no ponte sira iha sub-rejiaun Oésilo, Pássabe no Nítibe hanesan, kompañia Lifau Indah Unipesoál Lda, sei reabilita hosi suku Usitasa’e sub-rejiaun Oésilo to’o suku Lela-Ufe, sub-rejiaun Nítibe (STA 0+000-STA 5+500) ho valór kontratu hamutuk $735,776.66 ho durasaun servisu tinan ida.
Kompañia Am-Lhichoe Unipesoál Lda sei reabilita iha sub-rejiaun Pássabe hahú hosi suku Abani to’o suku Malelat, (STA 5+200-STA 7+600) ho valór kontratu hamutuk $491,895.57 ho durasaun servisu tinan ida.
Nune’e mós sei kontinua reabilita tán estrada rurál inklui ponte sira iha iha sub-rejiaun Pássabe, hahú hosi suku Abani to’o suku Malelat, (3+000-STA 5+200) ho valór kontratu hamutuk $622,244.44 ho durasaun serbisu tinan ida. Hosi orsamentu hirak-ne’e Autoridade RAEOA aloka hosi Orsamentu Jerál Estadu (OJE) 2023.
Notísia relevante: OJE 2023, RAEOA ezekuta ona 30,83%
Jornalista : Abílio Elo Nini
Editór : Evaristo Soares Martins
