OÉ-CUSSE, 02 juñu 2023 (TATOLI) – Durante fulan lima, hahú hosi janeiru to’o maiu, Autoridade Rejiaun Administrativa Espesiál Oé-Cusse Ambeno (RAEOA), lideradu Arsénio Paixão Bano, ezekuta ona Orsamentu Jerál Estadu (OJE) 2023 nian ho pursentu 30,83.
Notísia relevante: OJE 2023: RAEOA define programa 16 korresponde ho millaun $120
Sekretária Rejionál ba Asuntu Finansa, Maria Eliza Maniquim, esplika, Parlamentu Nasionál aprova millaun $120 ba Oé-Cusse, komposta hosi Fundu Espesiál Dezenvolvimentu (FED) millaun $36 no administrasaun millaun $84.
“Hosi millaun $84 ne’e nia ezekusaun durante fulan lima, nia atinjementu 10,62% ekivalente ba millaun $7,476.786, ba FED millaun $36, nia ezekusaun ne’e atinje 20,21%, ekivalente ba $4,959.012,” Maria Eliza Maniquim, relata ba jornalista sira iha Gabinete ZEESM, Oé-Cusse, sesta ne’e.
Maria Eliza Maniquim, esplika, ezekusaun pursentu ne’e, aloka ba iha programa sira-ne’ebé implementa iha Oé-Cusse, liuliu boa-governasaun no planu sira-ne’ebé ajenda ona iha Planu Asaun Annuál (PAA) 2023 liuhosi dalan ba futuru nian.
“FED ita uza ona ba iha pagamentu infraestrutura, aeroportu no despeza sira, eletrisidade renovavel, konetividade nasionál kultura patrimóniu no reforma Estadu inklui programa seluk relevánsia ho Fundu Espesiál Dezenvolvimentu nian, ida-ne’e maka nia gastu 20,21%, kona-bá administrasaun millaun $84, nia ezekusaun ba pagamentu projetu fíziku, inklui despeza operasionál sira-ne’ebé kada divizaun implementa programa no atividade sira,” nia afirma.
Parlamentu Nasionál aprova millaun $120 ba Oé-Cusse ho kategoria lima, maka hanesan;
Sálariu no vensimentu
Iha 2022 hamutuk $11,086,859.00 ba Grande Opsaun Planu 2023 $12,577,374.96 ba tetu OJE 2023 hamutuk $12,559,985.00.
Bens no servisu
Iha 2022 hamutuk $21,361,440.00, ba Grande Opsaun Planu 2023 $23,542,618.21 ba tetu OJE 2023 hamutuk $26,078,050.39.
Transferénsia públika
Iha 2022 hamutuk $4,410,587.00 ba Grande Opsaun Planu 2023 $6,272,699.33 ba tetu OJE 2023 hamutuk $5,744,5888.52.
Kapitál menór
Iha 2022 hamutuk $647,155.00 ba Grande Opsaun Planu 2023 $5,776,932.00 ba tetu OJE 2023 hamutuk $3,556,752.00.
Kapitál dezenvolvimentu
Iha 2022 hamutuk $52,059,303.00 ba Grande Opsaun Planu 2023 $82,163,918.80 ba tetu OJE 2023 hamutuk $72,061,624.09.
Nune’e totál totál OJE 2022 hamutuk millaun $89,565,344.00 iha Grande Opsaun Planu OJE 2023 hamutuk millaun $130, 333,543.30, no iha tetu OJE 2023 hamutuk millaun $120,000,000,00.
Notísia relevante: PN aprova OJE 2023 millaun $120 ba RAEOA
Jornalista: Abílio Elo Nini
Editór: Evaristo Soares Martins
