OÉ-CUSSE, 18 juñu (TATOLI)—Xefe aldeia Maunaebeno, suku Cunha, sub-rejionál Pante Makasar, Jeroni Lafo Colo, hateten komunidade iha aldeia Maunaebeno maioria hotu-hotu kuda foos-rai kór metan maibé to’o tempu kolleta uza ba han de’it, maibé estrada ne’ebé aat difikulta sira atu faan sira-nia produtu iha merkadu.
Notísia Relevante: Autoridade RAEOA enkoraja komunidade konserva bee-matan Oé-Naek
“Ha’u-nia komunidade maiória kuda foos-rai kór metan. Kada tinan, tempu atu kuda komunidade11:56:56 sira uza haree ne’e kuda iha toos, to’o tempu kolleta uma kain ida bele hetan foos saka lima (5) ba leten maibé uza ba han de’it. Ema balun dehan foos-metan ne’e folin maibé atu faan iha ne’ebé para ema sosa,” Xefe aldeia Maunaebeno hateten ba Agência TATOLI, hafoin autoriadde RAEOA halo diálogu komunitáriu ho komunidade iha aldeia Maunaebeno, sesta ne’e
Durante tinan barak ona sira tenta buka dalan atu faan sira nia produtu ne’e ba merkadu maibé sedauk hetan merkadu atu faan sira-nia produtu ne’e. Iha tinan kotuk, nia dehan, negosiante ida hosi Dili hola foos-metan iha aldeia ne’e maibé mai dala ida de’it tanba estrada aat.
“Ami hanoin katak ida-ne’e foos metan, ema sei la sosa tanba foos ne’e iha uluk kedas ita-nia bei-ala sira uza ba han nian, entaun ema sei la fó importánsia. Maibé foin dadauk ema ida hosi Dili mai hola iha ne’e dehan, foos ne’e nia folin di’ak,” nia dehan.
Entretantu Komunidade Maunaebebno, Agustinho Sila hateten, aleinde prodús foos-metan ne’e komunidade barak mak moris ho kuda modo, tanba ema hosi Organizasaun Naun Governamentál (ONG) balun mai hanorin sira kona-ba oinsá kuda modo ho di’ak no oinsá atu faan.
“Ami ne’e moris ho kuda modo no faan modo. Ami kuda señoura, rapollu, modo-mutin, forerai, fore-munggu no bua-malus. Iha ne’e ami riku ho modo-tahan no ai-fuan maibé fatin atu faan mak laiha,” Agustinho Sila hato’o kestaun ne’e ba autoridade RAEOA iha diálogu komunitáriu.
Hatan ba preokupasaun ne’e, Prezidente Autoridade RAEOA, Arsenio Paixão Bano husu ba komunidade sira atu kontinua servisu no autoridade sei buka dalan atu responde ba preokupasaun hirak ne’e.
“Ba sasán sira ohin imi hatoo mai mai, autoridade sei aponta buat hotu, ita bele halo. Maibé, agora ita hotu preokupa COVID-19 atake ita. Ha’u hakarak imi halo hanesan ne’e, ró Succses sira mai hosi Dili lori hahan, entaun ró Succses bainhira fila mós tenke lori hahan Oé-Cusse ba Dili. Maibé, hanoin ida-ne’e atu la’o di’ak liu, bainhira ita livre ona hosi pandemia COVID-19. Imporante kontinua servisu no servisu nafatin,” Arsénio Bano hateten.
Jornalista: Abilio Elo Nini
Editór: Cancio Ximenes
