DILI, 06 marsu 2024 (TATOLI) – Embaixadór Tailándia foun, Atipat Rojanapaibulya, kuarta ne’e, entrega karta kredensiál ba Prezidente Repúblika, José Ramos Horta, hodi bele hala’o misaun diplomata iha Timor-Leste.
“Ohin, Embaixadór foun hosi Tailándia nian mai entrega karta kredensiál ba Prezidente Repúbkika. Hanesan bainbain Embaixadór sira atu mai hala’o misaun iha ne’e tenke entrega uluk karta kredensiál,” Ministru Prezidensia Konsellu Ministru no Ministru Negósiu Estranjeiru no Kooperasaun (MNEK) interinu,Hermenegildo Augusto Cabral Pereira “Agio Pereira” hatete ba jornalista sira iha Palásiu Prezidensiál Dili, kuarta ne’e.
Embaixadór foun Tailándia iha planu no ideia atu atu apoia dezenvolvimentu Timor-Leste nian liuhosi hametin kooperasaun entre nasaun rua.
“Embaixadór foun sei servisu maka’as hodi hala’o kooperasaun iha área edukasaun, agrikultura, meu ambiente ne’ebé mundu tomak ko’alia,” Governante ne’e akresenta.
Atipat Rojanapaibulya mai asume fali kargu Embaixadór hodi subtitui Embaixadór sesante Ekopol Poolpipat.
Rekorda fali katak, antes ne’e Xefe Estadu José Ramos Horta, liuhusi dekretu PR númeru 48/2023, kondekora ho grau medalla ordem de Timor-Leste ba Embaxadór Tailándia sesante, Ekopol Poolpipat.
Serimónia kondekorasaun ne’e hala’o direta hosi Prezidente Repúblika, José Ramos Horta, iha Palásiu Prezidensiál Bairru Pite, tinan kotuk.
Orden Timor-Leste kria liuhusi dekretu lei númeru 20/2009, 06 maiu, ba ho prestíjiu no dignidade, demostra rekoñesimentu Timor- Leste ba sidadaun nasionál no estranjeiru, iha ninia atividade profisionál, sosiál ka espontániu eroismu altruismu, kontribui signifikativamente iha benefísiu Timor-Leste ba timoroan ou umanidade.
Serbisu prestadu iha ámbitu relasaun entre Estadu ho sentidu promove amizade entre povu krusiál, kontribui mós ba pás, estabilidade nasionál no dezenvolvimentu iha Timor-Leste.
Asaun barak konkretiza hosi Embaixadór Tailándia ne’e kontribui mós ba promosaun amizade entre povu, reafirmasaun ba pás no fortifikasaun estabilidade nasionál iha Timor- Leste, timoroan barak benefísia esforsu hosi Embaixadór nian manifesta tempu naruk ninia misaun iha Timor-Leste, serbisu sira-ne’e merese hetan rekoñesimentu no valoriza hosi Estadu.
Prezidente Repúblika tuir termu artigu 85 alínea j) Konstituisaun Repúblika, konjuga ho artigu 2 no alínea a)-5 dekretu-lei númeru 20/2009, 06 maiu, dekreta kondekora ho orden Timor-Leste grau medalla ba Embaixadór Ekopol Poolpipat.
Notísia relevante: TL kontinua hametin relasaun ho Thailandia
Jornalista: Hortencio Sanchez
Editór : Florencio Miranda Ximenes
