OÉ-CUSSE, 06 marsu 2024 (TATOLI) – Jestór sub-rejiaun Oésilo, Benedito Ulan, promete sei defende nesesidade povu hodi asesu ba fasilidade Estadu hanesan infraestrutura bázika, saúde, edukasaun no bee-moos.
“Pás no estabilidade, maka sai fundamentál hodi bele garante setór sira seluk atu la’o ba oin, tán ne’e durante ha’u-nia mandatu, ha’u sei defende povu no esforsa ba iha área importante sira-ne’ebé povu presiza ba nesesidade moris loron loron nian,” Benedito Ulan, hato’o promesa ne’e iha ámbitu simu pose nu’udar jestór Oésilo.
Notísia relevanate: Rogério Lobato husu komunidade apoia jestór foun dezenvolve sub-rejionál Oésilo
Nia promete asegura fornesimentu bee-moos ba komunidade sira hotu, importante atu asesu ba bee-moos hanesan suku Bobometo ho suku Usitasa’e, tanba iha tempu bailoron enfrenta problema bee-moos.
“Saúde no edukasaun sei la sees hosi ha’u-nia atensaun, tanba setór rua ne’e, liga direita ba povu nia moris,” nia katak.
Nia dehan, iha setór saúde, tenke estabelese to’o nível suku no aldeia, kompleta ho fasilidade no ekipamentu tuir padraun inklui ambulánsia no garante estoke ai-moruk.
“Ida-ne’e tenke defende tanba korresponde direita povu nia moris, nune’e bele fasilita atendimentu di’ak no dignu, liuliu komunidade sira iha baze,” nia promete.
Iha setór edukasaun, nia dehan, sei servisu hamutuk ho diretór eskola sira no entidade tomak ne’ebé hola parte iha servisu edukasaun, atu hadi’a kualidade edukasaun iha ensinu hotu, nune’e bele hatudu prestasaun di’ak hodi hamorin imajen furak sub-rejiaun Oésilo.
“Ha’u sei tau matan mós ba asuntu infraestrutura bázika, hanesan asesu ba estrada, eletrisidade no asesu ba rede komunikasaun, iha parte seluk, ha’u sei hamutuk ho xefe suku sira atu identifika fali infraestrutura bázika sira-ne’e, nune’e bele alerta ba Governu liuhosi Autoridade RAEOA no instituisaun relevante sira, nune’e bele hetan konsiderasaun hodi responde,” nia katak.
Iha parte seluk durante asumi kargu nu’udar jestór sub-rejiionál Oésilo, sei akumula ideia sira hosi setór privadu sira, grupu kooperativa inovasaun, atu dezenvolve asuntu importante rua, hanesan setór agrikultura no turizmu.
“Atu termina ha’u-nia diskursu ida-ne’e, ha’u hakruk ba lisan kultura Oésilo, hodi servisu hamutuk promove unidade hodi kria pás no estabilidade, atu lori Oésilo sai prósperu ba futuru di’ak liután,” nia afirma.
Notísia relevante:Paulino Marques simu pose nu’udar jestór sub-rejiaun Pássabe
Entretantu, totál populasaun iha sub-rejiionál Oésilo 14.093, mai hosi suku tolu no aldeia 13, hanesan suku Bobometo 8.716, suku Usitasa’e 4.188 no suku Usitaqueno 1.189.
Jornalista: Abílio Elo Nini
Editór: Evaristo Soares Martins
