VIQUEQUE, 06 marsu 2024 (TATOLI)- Komunidade husi Suku Caraubalo, Uma Ki’ik no Uaimori, postu Administrativu Viqueque Vila, Munisípiu Viqueque preokupa ponte Baria-Laran kotu tanba difikulta movimentasaun transporte no ema.
Ponte ne’ebé lokaliza iha área Baria-Laran maizumenus metru hitu, no kotu hahú iha 2018 to’o agora laiha manutesaun.
“Iha tempu udan ona ami labele bá faan ami-nia produtu lokál sira iha vila ne’ebá tanba ita la’o liu hosi mota no tauk bee mota lori ami. Ho situasaun ne’e ami rai de’it modo sira to’o dodok hotu nomós tempu udan labarik sira ba eskola mós tauk,”, Komunidade Suku Caraubalo, Paulina Amaral, hateten ba jornalista sira, iha ponte Baria Laran, suku Caraubalo, ohin.
Ho situasaun ne’e, nia husu ba Governu hodi tau atensaun liuliu halo rabilitasaun ba ponte Baria-Laran, nune’e bele fasilita abitante sira-nia movimentu.
Iha fatin hanesan, Veteranu Mateus Lopes, reforsa ponte ne’ebé kotu ne’e difikulta tebes ba komunidade no estudante sira hodi asesu ba eskola no merkadu.
“Ho kondisaun ponte kotu ne’e, ha’u husu ba Governu tau matan ba ponte ne’e hodi’a atu fasilita ita-nia abitante sira movimentu”. Nia hato’o.
Hataan ba preokupasaun ne’e, Diretór Servisu Obra Públika Munisípiu Viqueque, Mario do Rego, afirma iha tinan kotuk ekipa MOP hosi nasionál mai haree direta ona konidsaun ponte ne’e, maibé seidauk iha resposta ruma.
“Nune’e, komunidade nia preokupasaun ne’e amo rejista ona no sei relata nafatin ba nasionál hodi tau prioridade ba reabilitasaun”, nia promote.
Tuir dadús abitante sira ne’ebé asesu ba ponte Baria-Laran kompostu husi suku Uma Ki’ik no Suku Uaimori ho totál uma-kain 300 no totál abitante purvolta na’in-1.000 resin.
Notísia relevante:Autoridade no abitante Uatucarbau ho inisiativa aterru rai ba ponte kotu
Jornalista : Vitorino Lopes da Costa
Editór : Florencio Miranda Ximenes
