VIQUEQUE, 06 marsu 2024 (TATOLI)- Ministériu Agrikultura, Peska, Pekuaria no Floresta (MAPPF), kuarta ne’e, koloka ona ekipamentu pezadu hodi ajuda agrikulór sira halo normalizasaun ba irrigasaun iha suku Uaimori, postu administrativu Viqueque-Vila, munisípiu Viqueque.
Xefe Departamentu Programa Extensaun Agrikola Servisu Agrikultura Munisípiu Viqueque, Agustinho Pinto Mascarinhas, hateten, irrigasaun Uamori ne’e fornese bee ba natar ektare 84.
“Natar sira-ne’e abandona kuaze tinan tolu ona tanba impaktu hosi irrigasaun aat.Tanba ne’e, destaka ona ekipamantu pezadu hodi normaliza ba kanal irrigasaun husi mota Uaimori no liga ba natar parte tolu ho distánsia metru 800”, Xefe Departamentu Programa Extensaun Agrikula Servisu Agrikultura Munisípiu Viqueque, Agustinho Pinto Mascarinhas, hateten ba Agência TATOLI, I.P, iha postu Viqueque Vila, ohin.
Objetivu hosi normalizasaun irrigasaun ne’e, nia dehan atu agrikultór sira bele hala’i fila-fali sira-nia natar hodi hasa’e produsaun hare.
“Ita nia agrikultór mós ajuda ho ekipa halo normalizasaun ba irrigasaun husi mota no hamoos sedimentasaun iha irrigasaun atu bee bele to’o ba natar sira”, nia afirma.
Tuir dadús natar iha fatin tolu ne’e kompostu husi Uaileu ho ektare 14, natar área Uailabua ektare 50 no natar parte Kai-Uroa ektare 20. Enkuantu natar sira ne’e fó benifísia ba uma-kain 60 ho totál abitante 100-resin ne’ebé hela iha suku Uaimori.
Notísia relevante:MAFPP destaka ekipamentu pezadu hodi normaliza irrigasaun paetun Uatulari
Jornalista : Vitorino Lopes da Costa
Editór : Florencio Miranda Ximenes
