iklan

EKONOMIA, HEADLINE

Ministériu Agrikultura sei distribui ró 11 ba peskadór sira iha munisípiu tolu

Ministériu Agrikultura sei distribui ró 11 ba peskadór sira iha munisípiu tolu

Grupu peskadór iha Manatuto simu ró husi MAPPF.

DILI, 06 marsu 2024 (TATOLI) – Ministériu Agrikultura, Pekuária, Peska no Floresta (MAPPF) hakarak distribui, iha semana oin, bero 11 ba peskadór sira iha Covalima, Ainaro no Lautém atu fasilita sira hodi hala’o sira-nian atividade peska.

Diretór-Jerál Peska, Akikultura no Jestaun Rekursu Akuátiku, Celestino Barreto, informa katak ró 11 atu fahe, iha semana oin, ba peskadór sira iha Covalima hamutuk neen, Ainaro tolu, no Lautém rua.

“Ita bele dehan totál distribuisaun unidade 66 ona, signifika sei falta tan ró 22 maka diresaun asegura hela hodi hein atu distribui ba munisípiu sira seluk ne’ebé seidauk hetan hanesan RAEOA, Bononaro no Lautém parte norte nian”, Celestino Barreto informa iha Comoro, ohin.

Tuir dadus, ministériu iha totál ró 110 ne’ebé sosa ona, maibé 22 maka nia prosesu iha hela justisa, ne’e duni ró ne’ebé iha ona diresaun nia liman iha bero hamutuk unidade 88. Husi totál númeru ne’e, konsege distribui ona 55 ba peskoadór sira iha Dili no Ataúro unidade 14, Liquiçá sia, Viqueque 20, Manufahi neen, inklui Manatuto neen.

Ministériu disponibiliza bero ba peskadór sira nu’udar meiu transporte ida atubele hala’o sira-nian atividade loroloron nian iha tasi hodi bele lori bá fa’an iha merkadu sira. Tanba ne’e, kontinua husu ba peskadór sira katak ró ne’ebé Governu distribui ne’e tenke uza ho kuidadu, liuhusi halo jestaun di’ak atu asegura nia kondisaun.

Total ró ne’ebé MAPPF sosa iha tinan 2022 hamutuk 110 ho montante osan rihun $500 no ró ne’e ho nia kapasidade PK15. Ba 2024, Governu tau tan verba rihun $200 hodi sosa tan ró besik 40.

Peskadór João da Cruz husi Dili hatete katak ró ne’ebé ministériu apoia ba sira ne’e tulun tebes sira-nia atividade, tanba antes ne’e sira iha bero ida ho kondisaun ladi’ak ona no dala barak hasoru laloran no anin-boot sempre fó risku ba sira-nian vida.

“Ami hamutuk ema na’in-haat maka hala’o atividade peska. Bainhira ami hetan ona ikan ami bá fa’an nia rezultadu hanesan. Kuandu badinas, loron ida ami bele hetan to’o $100, maibé ne’e mós depende ba tempu”, realsa.

Notísia relevante: Grupu peskadór iha Manatuto simu ró neen husi MAPPF

Jornalista: Tomé Amado

Editora: Maria Auxiliadora

iklan
iklan

Leave a Reply

iklan
error: Content is protected !!