iklan

BOBONARO, HEADLINE, MUNISÍPIU, POLÍTIKA

PAM Bobonaro promete kria kondisaun hasoru implementasaun podér lokál no desentralizasaun administrativa

PAM Bobonaro promete kria kondisaun hasoru implementasaun podér lokál no desentralizasaun administrativa

Prezidente Autoridade Munisípiu Bobonaro, Alexandrino Pires. Imajen Tatoli/Sérgio da Cruz.

BOBONARO, 06 marsu 2024 (TATOLI) – Prezidente Autoridade Munisipál (PAM) Bobonaro, Alexandrino Pires, promete kria uluk kondisaun hodi hasoru implementasaun podér lokál no desentralizasaun iha futuru.

Maibé molok to’o polítika ne’e, nia sei tún direta ba terrenu atu halo vizita tama sai suku sira iha munisípiu refere, nune’e bele rona direta preokupasaun ne’ebé povu enfrenta.

Atu hatán ba programa serbisu ida di’ak, nu’udar Prezidente Autoridade Munisipál Bobonaro sei halo vizita ba postu administrativu neen, hodi halo reuniaun ho ferik-katuas sira, atu nune’e programa tinan oin (2025) bele hatán.

Notísia relevante: Povu Cailaco husu PAM Bobonaro foun hakbesik-an ba baze

Tuir nia, dezenvolvimentu iha munisípiu Bobonaro labele haree de’it atu dezenvolve infraestrutura bázika tanba setór ekonomia seidauk la’o ho di’ak.

Nia argumenta, bainhira governu atu halo dezenvolvimentu iha munisípiu Bobonaro tenke foka uluk ba setór agrikultura, liuliu irrigasaun, infraestrutura, estrada, turizmu, komérsiu, ekonomia, saúde, edukasaun no bee-moos.

“Setór hirak-ne’e henesan setór importante hodi hakat ba desentralizasaun ne’ebé sei realiza hosi Governu Sentrál iha munisípiu Bobonaro. Ha’u konvida Bobonaro-oan sira hotu mai kria polítika ekonimia iha munisípiu Bobonaro hodi halo mudansa, ita prepara kondisaun ne’ebé di’ak hodi hakat ba eleisaun kámara munisipál,” Alexandrino Pires, hato’o asuntu ne’e bainhira simu pose nu’udar Prezidente Autoridade Munisípiu Bobonaro hosi Sekretáriu Estadu Asuntu Toponímia no Organizasaun Urbana, Germano Santa Brites, iha Jináziu Maliana, kuarta ne’e.

“Bobonaro iha hotu nian, la’ós suku ida ka rua nian, problema iha munisípiu Bobonaro problema ita hotu nian, povu nia susar ho terus, ita hotu nia susar no terus, matak ita-nian no tasak ita hotu nian, tanba ita hotu husar tali lakotu iha rai ida-ne’e, raan ida de’it, laiha raan seluk tán,” nia tenik.

Nia husu ba funsionáriu hotu-hotu iha munisípiu Bobonaro atu presta serbisu ho kualidade nune’e bele serbí povu ho dignu.

“Ita valoriza ba inan-aman sira-ne’ebé dalaruma fuan moras ho imi-nia serbisu, prezudika sira mai hosi foho, dalaruma sira presiza imi-nia tulun,” nia hateten.

Iha tinan fiskál 2024, Administrasaun Munisipál Bobonaro hetan alokasaun orsamentu ho montante $9,270.244 komposta hosi saláriu no vensimentu $1,913.760, bens no servisu $897,486, transferénsia públika $3,706.713, kapitál menór $233,998 no kapitál dezenvolvimentu $2,518.244. Rezultadu ezekusaun OJE 2024 hosi portál transparénsia Ministériu Finansa hatudu katak, to’o loron 06 fulan-marsu, oras 16;31 foin 1.3%.

 

Munisípiu Bobonaro iha área luan 1,368.12 km2 no iha aldeia 193, suku 50 no postu administrativu neen hanesan; Atabae, Balibo, Cailaco, Maliana, Bobonaro no Lolotoe, ne’ebé tuir dadus tinan 2022 totál populasaun 106,543, komposta hosi feto 52,964, mane 53,579 ho totál xefe família 20,802.

Notísia relevante: Alexandrino Pires simu pose nu’udar PAM Bobonaro

Jornalista: Sérgio da Cruz
Editór: Evaristo Soares Martins

iklan
iklan

Leave a Reply

iklan
error: Content is protected !!