DILI, 06 marsu 2024 (TATOLI)–Primeiru-Ministru (PM), Kay Rala Xanana Gusmão, hala’o enkontru ho ninia omólogu Primeiru-Ministru Austrália, Anthony Albanese hodi reafirma kooperasaun bilaterál entre país rua, liu-liu setór importante sira ne’ebé fó benefísiu ba povu no nasaun.
Xefe Governu Austrália, Anthony Albanese hato’o benvindu ba Xefe Governu Xanana, ne’ebé hamutuk ho Xefe Governu no Xefe Estadu Asosiasau Nasaun Sudeste Aziátiku (ASEAN, sigla inglés) bele marka prezensa iha selebrasaun tinan 50 parseira Austrália ho ASEAN.
“Olá, Primeiru-Ministru Xanana, ita di’ak kalae? Benvindu mai iha simeira Austrália ASEAN nu’udar onradu ba Austrália hodi hametin kooperasaun rai rua,” Anthony Albanese, hateten bainhira simu vizita PM Xanana iha salaun enkontru, iha Sentru Konvensaun Melbourne, Austrália.
Notísia relevante : Embaixadora Caitlin atualiza vizita PM Xanana bá Austrália
Hafoin kaer liman, Xefe Governu rai rua ho delegasaun membru Governu sira kontinua hala’o reuniaun bilaterál hodi deskute kooperasaun.
PM Xanana ho orgullu agradese no hato’o parabéns ba Governu Austrália, ne’ebé tinan ne’e sai uma-na’in ba simeira Austrália-ASEAN hodi konvida mós Timor-Leste nu’udar nasaun observadór hodi rona no apreende rai seluk nia esperiénsia hodi kontribui atu lori Timor-Leste hetan susesu ba futuru hamutuk ho país membru nia apoiu.
“Ami agrades tebes, ho ekontru ida-ne’e ita deskute no serbisu hamutuk nafatin hodi kontinua hametin kooperasaun rai rua nian ne’ebé estabelese ona,” Xanana dehan.
Timor-Leste ho Austrália nia relasaun diplomátika no kooperasaun bilaterál metin no forte tebes, dezde nasaun rua ne’e hahú estabelese nia relasaun iha tinan 20 nia laran to’o ohin.
Iha ámbitu ne’e, Xefe Ezekutivu Timor-Leste agradese ba Governu Austrália nia domin hodi simu timor-oan sira kontinua serbisu hodi manán espriénsia oin-oin no simu estudante timor-oan hala’o estudu iha universidade iha Austrália.
Enkontru PM Xanana akompaña hosi Vise Primeiru-Ministru, Ministru Koordenadór Assuntu Ekonómiku no Ministru Turízmu no Ambiente, Francisco Kalbuadi Lay, Ministru Negósiu Estranjeiru no Kooperasaun, Bendito dos Santos Freitas, Vise-Ministra ba Asuntu ASEAN, Milena Rangel, Embaixadór Timor-Leste iha Austrália, Inês de Almeida, Xefe Gabinete Primeiru-Ministru, Elizabeth Exposto no ekipa tékniku. Enkuandu PM Austrália akompaña hosi Ministra Negósiu Estranjeru, Penny Wong no membru Governu sira.
Jornalista : Antónia Gusmão
Editora : Julia Chatarina
