iklan

COVALIMA, HEADLINE

Populasaun iha suku Belulik Leten no Fatumea difísil asesu ba bee-moos  

Populasaun iha suku Belulik Leten no Fatumea difísil asesu ba bee-moos  

Bee-moos. Imajen/Espesiál

COVALIMA,  06  marsu  2024 (TATOLI) – Maria Madalena, rezidente iha suku Belulik Leten, iha Fatumea, munisípiu Covalima, haktuir difikuldade ne’ebé populasaun sira hasoru, liuliu falta bee-moos ba konsumu loroloron nian.

Nia relata katak abitante balun kontinua konsumu udan-been, bee-mota no posu, nomós tenke la’o dook hodi bele asesu bee.

“Ami difísil atu asesu ba bee-moos, tanba ne’e bainhira iha tempu udan ami konsumu de’it  udan-been, se la’e ami sosa de’it kada tanke litru 5000 ho folin $25. Se ami laiha osan, bá kuru de’it bee ho distánsia kilo ida-resin”, Maria Madalena hatete, ohin.

Nia salienta katak problema bee-moos nafatin sai preokupasaun ida ne’ebé populasaun iha área rurál enfrenta, nune’e nia husu Governu tenke rezolve nune’e sira mós bele asesu bee ho normál.

Ba kestaun ne’e, Administradór Postu Fatumea, Cesar Madeira, rekoñese katak komunidade iha suku Belulik Leten kontinua halerik ba bee-moos, tanba sira hela iha rai-lolon nune’e susar atu hetan bee.

Nia lembra katak, iha  2012,  halo ona kanalizasaun bee, maibé tanba abitante laiha konsiénsia hodi estraga kanu mak difikulta sira atu asesu ba bee-moos. Hanesan autoridade sei buka solusaun atu nia emar sira bele asesu fali bee ho normál.

Postu Fatumea, suku Belulik Leten, iha totál populasaun 2.294 ho xefe família 552 mak daudaun ne’e sei falta ba bee-moos.

Iha sorin seluk, xefe suku Fohorem, postu Fohorem, Júlio Ferreira Alves, dehan komunidade iha suku ne’e nia problema hanesan ho postu sira seluk  tanba kontinua halerik ba bee-moos maski halo ona kanalizasaun bee, maibé laiha pesoál atu kontrola.

“Laiha pesoál atu kontrola, nune’e komunidade ida-idak ho inisitiva rasik hadi’a kanalizasaun, maibé balun sobu fali no ami difísil atu hetan bee-moos”, nia relata.

Suku Fohorem iha aldeia lima ho totál populasaun hamutuk 1.654 no xefe família 417.

Governu aprova Orsamentu Jerál Estadu tinan 2024 ba munisípiu Covalima hamutuk millaun $7,3, husi montante ne’e aloka ba programa água no saneamentu hamutuk $203.564.

Notísia relevante: Família 57 iha Zulo sosa bee ba nesesidade diária

Jornalista: Celestina Teles

Editora: Maria Auxiliadora

iklan
iklan

Leave a Reply

iklan
error: Content is protected !!