COVALIMA, 13 fevereiru 2024 (TATOLI) – Dezastre naturál ne’ebé akontese iha fulan-jullu 2023 afeta ba uma-kain 57 iha suku Zulu, iha Covalima, tanba rai-halai no danifika sistema kanalizasaun bee ba komunidade sira iha suku refere.
Tanba ne’e, to’o agora família sira ne’e labele asesu bee ho normál no atu hetan bee, sira tenke kontribui osan hodi sosa bee tanke litru 5000 ho presu $30 to’o 50 hodi uza ba nesesidade loroloron.
Xefe suku Zulo, João Lopes de Carvalho, dehan abitante iha aldeia Obukmil no Lale, iha Zulu, la asesu bee-moos ho normál, tanba rai-halai, ne’ebé obriga sira tenke muda sira-nian hela fatin bá iha bairru foun ho naran Ulo.
“Hafoin muda hela fatin nune’e, sira hasoru difikuldade asesu ba bee-moos, nune’e sira tenke tau osan hamutuk hodi sosa bee litru 5000”, João Lopes hatete, ohin.
Ho problema hirak ne’e, nia hato’o ona preokupasaun komunidade nian ba iha autoridade munisipál to’o iha nasionál, maibé seidauk hetan resposta.
Diretór Servisu Munisipál ba Água, Saneamentu no Ambiente (SMASA), Angelino Henrique, realsa kona-ba problema bee ne’e nia parte koordena ona ho Bee Timor-Leste (BTL) atu haree asuntu ne’e.
“Atu rezolve problema bee iha suku Zulo, ita presiza atu halo proposta ba Administrasaun Munisípiu Covalima, nomós halo koordenasaun ho BTL, maibé sei identifika mós problema”, dehan.
Iha sorin seluk, Administradór Munisípiu Covalima, Francisco de Andrade, husu ba SMASA atu hato’o proposta ho urjente, tanba nia rasik observa direta ona iha bairru foun Ulo ne’e komunidade difísil asesu bee no sira sosa de’it hodi uza ba nesesidade loroloron.
Notísia relevante: BTL halo levantamentu dadus ba komunidade falta bee-moos iha Covalima
Jornalista: Celestina Teles
Editora: Maria Auxiliadora
