OÉ-CUSSE, 06 marsu 2024 (TATOLI) – Prezidente Autoridade Rejiaun Administrativa Espesiál Oé-Cusse Ambeno (RAEOA), Rogério Tiago Lobato, akompaña hosi Koordenadór Ezekutivu Zona Espesiál Ekonómia Dezenvolvimentu Oé-Cusse Ambeno (ZEEDOA), João Mendes Gonçalves, kuarta ne’e fó pose bá Benedito Ulan, nu’udar jestór foun iha sub-rejionál Oésilo.
Iha serimónia pose ne’e, Rogério Tiago Lobato, husu komunidade suku Bobometo, Usitasa’e no Usitaqueno pertense sub-rejiaun Oésilo atu serbisu hamutuk ho jestór foun hodi dezenvolve sub-rejiaun Oésilo.
Notísia relevante: Paulino Marques simu pose nu’udar jestór sub-rejiaun Pássabe
Eis Ministru Interiór ne’e, fó hanoin, halakon diskriminasaun, iha kór polítiku, etnia no relijiaun, maibé presiza hamutuk sai ida de’it, la’ós de’it iha ibun maibé ho fuan no hahalok ho asaun ida de’it hamutuk fó liman ba malu dezenvolve rai Oé-Cusse.
“Ha’u husu ba imi apoia administradór foun, xefe postu uluk iha podér, dalaruma karreta aat atu hadi’a osan laiha, ne’e labele, tanba sira mai iha-ne’e, reprezenta podér Estadu, sira iha-ne’e mak reprezenta RAEOA, depois Estadu ne’e ita hotu, karrreta motorizada tenke iha para hala’o servisu, ne’e duni imi labele hateke de’it mai ha’u, maibé imi hamutuk mak dezenvolvimentu bele la’o,” Rogério Tiago Lobato, ko’alia Oesilo.
Jestór nomeadu sub-rejiaun Oésilo, Benedito Ulan, agradese ba konfiansa no promete sei serbí ba komponente hotu iha sub-rejiaun Oésilo hodi kontribui ba prosesu dezenvolvimentu nasionál.
“Ha’u agradese ba IX Governu Konstitusionál liuhosi Autoridade RAEOA, ne’ebé depozita konfiansa tomak mai ha’u, atu serbí iha Oésilo, rai ne’ebé ha’u moris fatin, nu’udar Oésilo oan, ha’u simu konfiansa ida-ne’e, ho onra no responsabilidade atu serbí no kontribui ba prosesu dezenvolvimentu iha Oésilo, tuir planu no polítika IX Governu Konstitusionál nian,” nia katak.
Notísia relevante: Paulino Marques husu Autoridade RAEOA prioriza estrada iha Pássabe
Eis profesór ne’e, garante sei halibur entidade relevante sira mai hosi iha suku tolu, sub-rejiaun Oésilo atu hametin pás no estabilidade.
“Hanesan Oésilo oan, ha’u sei hakuak no envolve sira hotu hahú hosi autoridade lokál sira, veteranu, eis kuadru rezisténsia, grupu juventude, intelektuál, autoridade relijioza, autoridade seguransa iha sub-rejionál Oésilo, atu hamutuk hametin pás no estabilidade,” nia promete.
Jestór sesante, Domingos Marques, entrega kedas relatóriu inklui patrimóniu Estadu nian, no promete sei koopera servisu hamutuk ho lideransa foun, hodi dezenvolve sub-rejiaun Oésilo.
“Ha’u simu kolega Benedito Ulan, atu sai administradór postu Oésilo, ne’ebé ba ha’u la’ós buat foun, tanba ita nu’udar ema servidór tempu to’o ona atu troka, no tempu atu serbí, tán ne’e ohin ha’u entrega patrimóniu Estadu ba lideransa foun,” nia katak.
Notísia relevante:Autoridade RAEOA inaugura ponte Bitopa fasilita komunidade sub-rejiaun tolu
Entretantu, totál populasaun iha sub-rejiaun Oésilo hamutuk hamutuk 14.093, mai hosi suku tolu no aldeia 13, hanesan suku Bobometo 8.716, suku Usitasa’e 4.188 no suku Usitaqueno 1.189.
Jornalista: Abílio Elo Nini
Editór: Evaristo Soares Martins
