Autoridade Munisípiu tenke hahú prepara kondisaun hodi hasoru polítika podér lokál
OÉ-CUSSE, 07 marsu 2024 (TATOLI) – Ministru Administrasaun Estatál (MAE), Tomás do Rosário Cabrál, fó sai katak papél autoridade munisipíu tenke hahú prepara kondisaun mínima hodi hasoru implementasaun polítika podér lokál no desentralizasaun administrativa iha futuru.
Notísia relevante: Xanana hakarak konsensu iha implementasaun poder lokál no desentralizasaun
Governante ne’e, informa, hafoin kompleta ona estrutura autoridade munisipíu inklui Rejiaun Administrativa Espesiál Oé-Cusse Ambeno (RAEOA), planu Governu Sentrál sei kria kondisaun mínimu ba Autoridade munisipíu hodi prepara ba implementasaun podér lokál.
“Munisipíu hotu-hotu iha ona autoridade órgaun direita hosi Estadu, Primeiru Ministru mak nomea, sira responde direitamente ba Primeiru Ministru, sira tutela de’it mai ha’u, sira-nia papél atu halo saida, prepara kondisaun ba primeiru implementasaun podér lokál sira,” Tomás Cabrál, ko’alia iha Nítibe, Oé-Cusse, kinta ne’e.
Nia fundamenta, kalendáriu implementasaun polítika nasionál ne’e, sei presiza rezolusaun ida no sei prenxe hosi autoridade munisipíu.
“Ami foin fulan hitu, nia kaléndariu implementasaun, tenke aprova ho rezolusaun ida, autoridade munisipíu sira, hetan ona prenximentu, sei iha diskusaun orsamentu 2025 nian, foin hatama rezolusaun, tuir preparativu, iha fim de 2026 ne’e, sei halo avaliasaun kondisaun mínimu, munisipíu ne’ebé maka prepara atu ba podér lokál,” nia katak.
Kona-bá estratéjia implementasaun, nia dehan, agora fó podér ba munisípiu sira, balun foin fulan ida, balun foin semana ida, sira tenke prepara sira-nia kondisaun, hanesan mós ho RAEOA tenke prepara.
“Maka ita foin bele la’o, ne’e maka avaliasaun kondisaun mínimu tenke halo, ho kapasidade finanseiru no administrasaun ne’ebé sira iha,” nia hateten.
Nia hatutan, administrasaun no finansa sira-ne’e, kapasidade ba dezenvolve nivél kraik ne’e maka sira tenke sukat sira-nia forsa, tanba delegasaun territorial servisu sira foin hahú, Ministériu Administrasaun Estatál sei fó bá kraik.
Nia husu entidade hotu, liuliu jornalista sira, tenke halo publisidade Estadu nian, pás no estabilidade, dezenvolvimentu atu la’o tenke iha pás, tenke iha estabilidade.
“Maibé sei ita selok malu hela, entaun dezenvolvimentu sei la la’o.”
Notísia relevante: PAM Bobonaro promete kria kondisaun hasoru implementasaun podér lokál no desentralizasaun administrativa
Jornalista: Abílio Elo Nini
Editór: Evaristo Soares Martins
