iklan

COVALIMA, HEADLINE

Miguel Armada Cardoso asume knaar nu’udar PAM Covalima

Miguel Armada Cardoso asume knaar nu’udar PAM Covalima

Sekretáriu Estadu Dezenvolve Lokál, Mateus dos Santos Tallo, fó pose ba Prezidente Autoridade Munisípal Covalima foun, Miguel Armada Cardoso. Imajen/Celestina Teles.

COVALIMA, 07 marsu 2024 (TATOLI) – Sekretáriu Estadu Dezenvolmentu Lokál, Mateus  dos Santos Tallo, fó pose ba Miguel Armada Cardoso hodi asume kargu nu’udar Prezidente Autoridade Munisipál (PAM) Covalima ba períodu 2024-2028.

Mateus Tallo  husu ba prezidente autoridade foun ho nia estrutura atu tau importánsia ba hadi’ak setór infraestrutura bázika, liuliu konstrui estrada munisipál, rurál no ponte hodi loke konetividade entre área urbana no rurál iha munisípiu ne’e tanba iha poténsia ba setór agríkola, nune’e bele transporta sira-nian produtu bá merkadu.

“Munisipiu Covalima iha poténsia boot ba setór indústria mina no gás. Tinan kotuk, ita kompleta ona perfurasaun ba posu rai maran nian iha fatin tolu no tinan ida ne’e iha planu atu kontinua halo perfurasaun ba posu rua tan”, governante ne’e dehan iha ámbitu tomada pose ba PAM Covalima, ohin.

Nia salienta Governu iha ona planu atu utiliza ona aeroportu Suai ba elikópteru ne’ebé baibain transporta ema ka crew change husi Bayu-Undan. “Ida-ne’e hatudu katak oportunidade ba reseita doméstika sei iha. Ha’u apela ba PAM foun ho nia estrutura tomak atu komesa halo ona planu hodi prepara ita-nian rekursu umanu liuhusi formasaun ba área refere”, dehan.

Mateus Tallo relembra katak, antes ne’e, husi  IV no V Governu Konstitusionál hahú ona Mega Projetu Supply Base iha Suai, ne’ebé hatuur Covalima nu’udar parte intergadu ida husi Projetu Tasi Mane nian, ne’ebé projeta daudaun Covalima nu’udar sentru abastesimentu iha Timor-Leste no iha rejiaun.

“Implementasaun desentralizasaun mós sei fó kontribuisaun boot ba promove koezaun territoriál, iha tempu hanesan loke mós espasu ba liberdade ne’ebe boot liu iha munisípiu sira atu prosesa no foti desizaun iha nível lokál”, nia hatete.

Prezidente Autoridade Covalima foun, Miguel Armada Cardoso, agradese ba Primeiru-Ministru, Xanana Gusmão, liuhusi Ministériu Administrasaun Estatál (MAE) ne’ebé fó fiar atu halo dezenvolvimentu iha rai refere.

Nia dehan konfiansa ne’ebé mak fó ba PAM Covalima atu instala administasaun tranzitória hodi hein eleisaun autoridade munisipál no eleisaun asembleia munisipál, nune’e iha podér hodi halo jestaun ba foti desizaun.

“Atu serbisu ho efetivu no efikásia presiza ita-boot sira-nian tulun husi sekretáriu autoridade munisipál na’in-tolu no diretór munisipál, administradór postu sira no líder komunitáriu sira hodi fó apoia másima ba PAM”, nia husu.

Bazeia ba despaxu Primeiru-Ministru númeru 015/GPM/II/2024 nomeia PAM Covalima konsidera hanesan pesoál koletiva direitu públiku dotada autonomia administrativa, autonomia finanseira ne’ebé sujeita no tutela ba MAE, regula ho estatutu autoridade munisipál no grupu tékniku interministeriál ba desentralizasaun administrativa aprova husi Dekretu-lei Númeru 3/2016, 16 marsu.

Ho redasaun aprova hosi Dekretu-lei númeru 84/2023, 23 novembru, konsidera PAM hanesan reprezenta Governu  hodi asegura koordenasaun serbisu administrasaun lokál Estadu hodi ezerse serbisu iha munisípiu atu responde atividade tutela iha MAE iha artigu 20 husi Dekretu-lei númeru 3/2016, 16 marsu.

Filomeno Cardoso subtitui Miguel Armada Cardoso ba sekretáriu munisipál

Sekretáriu Estadu Dezenvolvimentu Lokál, Mateus dos Santos Tallo, fó mós pose ba Filomeno Cardoso nu’udar Sekretáriu Munisípal ba Asuntu Sosiál no Organizasaun hodi substitui Miguel Armada Cardoso ne’ebé asume fali kargu foun ba PAM Covalima.

“Fó pose ba sekretáriu munisípal ba asuntu sosiál foun, kompleta ona estrutura autoridade Covalima. Ho nune’e, hakarak apela mós ba autoridade lokál, sosiedade sivíl no militár atu serbisu hamutuk hodi dezenvolve ekonómia ida sustentável ba ita-nian rain hodi fó moris di’ak ba sidadaun”, Mateus Tallo hatete iha salaun Autoridade Munisípiu Covalima, ohin.

Sekretáriu Munisipál Asuntu Sosiál no Organizasaun, Filomeno Cardoso, promete sei esforsu hodi hala’o serbisu tuir matadalan IX Governu ne’ebé lidera husi Primeiru-Ministru, Kay Rala Xanana Gusmão.

“Atu implementa programa haree liu ba asuntu sosiál, labele sees husi matadalan ne’ebé Governu implementa hela. Ita sei la’o tuir koridór IX Governu hodi fó apoiu serbisuliga ba asuntu sosiál”, nia dehan.

Sekretáriu munisipál nia parte sei halo esforsu hodi adapta knaar foun ne’ebé simu hodi serbí ba  povu ho responsabilidade, tanba kargu ne’e públiku nian no tempu ida sei para no tempu ruma kontinua.

Rekorde katak, iha loron  06 marsu, Vise-Ministru Administrasaun Estatál, Jacinto Rigoberto, fó uluk ona pose ba kargu Sskretáriu munisipál administrasaun no Finansa, Albeto Moniz de Araújo, Sekretáriu Munisipal Planeamentu Investimentu no Dezenvolvimentu Integradu, Caetano Ribeiro, no Sekretáriu Munisipál Asuntu Sosiál no Organizasaun, Miguel Armada Cardoso, ho diretór munisipál na’in-18.

Nomeiasaun sekretáriu munisipál, diretór servisu munisipál  no administradór postu sira tuir artigu 32 husi Dekretu-lei númeru 3/2016,16 marsu ho redasaun aprovadu husi Dekretu-lei númeru 84/2023, 23 novembru, konsidera diretór musipál hanesan responsavel husi diresaun servisu munisipal ierarkia husi Prezidente Autoridade Munisípiu Covalima.

Dekretu-lei númeru 3/2016, 16 marsu ho redasaun aprovadu husi Dekretu-lei númeru 84/2023, 23 novembru, maibé iha despaixu ne’e seidauk fiksa prezidente autoridade foun ba Covalima.

Notísia relevante: Implementa polítika desentralizasaun administrativa, Covalima kompleta estrutura munisipál

Jornalista: Celestina Teles

Editora: Maria Auxiliadora

iklan
iklan

Leave a Reply

iklan
error: Content is protected !!