NASIONÁL, HEADLINE, KAPITÁL

Ministra Verónica husu dirijente foun tau importánsia ba interese povu

Ministra Verónica husu dirijente foun tau importánsia ba interese povu

Serimónia tomada pose ba kargu xefia no diretór MSSI, iha salaun Caicoli, kinta (07/03/2024). Imajen Tatoli/Francisco Sony

DILI, 07 marsu 2024 (TATOLI)—Ministra Solidaridade Sosiál no Inkluzaun, Verónica das Dores, kinta ne’e, fó pose ba diretór jerál, diretór nasionál, xefe departamentu, no diretór munisipál hamutuk 78.

“Ha’u husu ba imi sira ne’ebé ohin simu ona pose, nafatin iha kompromisu hodi serví povu no Estadu liuhosi knaar hirak ne’ebé simu. Ha’u husu tau importánsia ba interese nasaun no povu, no tenke halo atendimentu ba ita-nia povu iha 24 oras, liu-liu ba karreta funeráriu, dezastre naturál tenke tau atensaun,” Ministra hato’o liuhosi diskursu iha salaun Ministériu Solidaridade Sosiál no Inkluzaun (MSSI), Caicoli.

Governante ne’e fó hanoin, kargu sira ne’ebé hetan la signifika ba oin halo konforme hakarak, maibé tenke prontu serví povu, serbisu hamutuk nu’udar ekipa, aselera programa sira hodi alkansa meta no importante liu iha benefísiu ba povu.

“Kargu ne’e signifika ita serbisu hamutuk, konsulta ba malu, rona malu, tulun malu, kargu ne’e la signifika atu manda de’it ema seluk, maibé apoia malu iha serbisu, deskute hodi buka solusaun ba problema, la dramatiza sasán, no seluk tan,” nia fó hanoin.

Notísia relevante : MSSI lansa portál seguransa sosiál Timor-Leste

Aleinde ne’e, Ministra husu ba emposadu sira, atu ba oin halo serbisu ho kualidade di’ak.

“Kargu ne’e misaun, misaun atu serví, atu hadi’a ema kbiit laek sira-nia moris, misaun atu hadi’a, halo kma’an ema seluk nia terus, tanba kargu ne’e signifika oferese ita-nia an ba servisu sosiál ba ema, ita serbisu tau-matan ba povu, hahú kedas hosi kabun laran, moris mai no to’o mate,” nia akresenta.

Iha fatin hanesan, Inspetora, Sónia da Silva, reprezenta Prezidente Komisaun Funsaun Públika (KFP), hateten, parte Komisaun kontinua ho serbisu atu harii funsaun públika ida ho baze permanente no organizadu, ne’ebé komisaun iha devér no direitu sira atu kontribui ho determinasaun no responsabilidade hodi alkansa objetivu sira ne’ebé determina ona iha programa IX Governu Konstitusionál.

“Atu alkansa objetivu ida-ne’e, ita tenke kombate atitude balun ne’ebé ladi’ak, liu-liu atitude imobilidade no halai hosi responsabilidade. Funsionáriu barak mak hatoman-an atu halo asaun bainhira hetan orden ka bainhira hetan supervizaun hosi superiór sira, funsionáriu sira-nia kapasidade atu hamosu inisiativa hodi halo asaun rasik ne’e mínimu tebes,” nia hateten.

Nune’e, nia husu emposadu sira tenke iha devér hala’o l knaar ho didi’ak, uza abilidade jestaun no lideransa ho didi’ak hodi hamosu no hafanun sentimentu nasionalizmu hanesan servidór públiku.

KFP sei enkoraja inisiativa no dezenvolve kapasidade funsionáriu sira atu foti desizaun, maibé presiza mós rekoñese no rekompensa funsionáriu hirak ne’ebé dezempeña funsaun ne’ebé sai modelu ezemplar di’ak tanba bainhira ho inisiativa funsionáriu bele foti desizaun sira ne’ebé fó benefísiu ba progresu serbisu.

“Ita hotu ne’ebé kaer pozisaun jestaun iha administrasaun públika tenke lidera ho modelu ezemplár ba subordinadu sira, só hanesan ne’e de’it mak ita sei iha autoridade morál atu ezije ita-nia subordinadu sira atu halo tuir modelu ezemplár ne’ebé ita halo. Líder ida labele haketak-an hosi étika, laiha líder ida ne’ebé mak laiha étika, ne’e katak prátika koerénsia entre ita-nia diskursu no hahalok ka asaun sira ne’e importante tebes,” Sonia tenik.

Xefe Departamentu, Diretór Jerál, Nasionál no Munisípiu MSSI ne’ebé ohin simu pose hahú hosi Diretór Jerál Servisu Korporativu, Diretór Jerál Protesaun Sosiál, Diretór Jerál MSSI, Inspetór Jerál Auditória MSSI, Sub-Inspetór no Sub-Inspetór Auditória.

Diretór Nasionál MSSI hamutuk ho Xefe Departamentu Nasionál hamutuk 25, Diretór munisípiu Lautém, Viqueque, Baucau ho Xefe Departamentu hamutuk 12.

Diretór ba munisípiu Dili, Bobonaro, Ermera, Liquiçá ho Xefe Departamentu hamutuk 11, enkuantu Diretór MSSI ba munisípiu Aileu, Ainaro, Manufahi, Covalima ho Xefe Departamentu hamutuk 24.

Jornalista     : Arminda Fonseca

Editora          : Julia Chatarina

iklan
iklan

Leave a Reply

iklan
error: Content is protected !!