MSSI promove ema ho defisiénsia rua asume kargu xefia
DILI, 07 marsu 2024 (TATOLI)—Ministériu Solidaridade Sosiál no Inkluzaun (MSSI), kinta ne’e, promove ema ho defisiénsia fíziku na’in-rua hodi asume kargu nu’udar Diretór no Xefe Departamentu.
Defisiénsia fíziku ne’ebé MSSI promove mak hanesan António José Aniceto Sarão nu’udar Xefe Departamentu Administrasaun Rekursu Umanu, Domingos Henriques Maia nu’udar Diretór Nasionál Pessoa Portadora Defisiénsia.
“Ha’u sente kontete tebes tanba ministériu hahú ona promove inkluzaun ba dahuluk, bele promove ami kaer kargu nu’udar diretór ida ne’e ha’u sente previléziu boot ida no responsabilidade ida ne’ebé fó ha’u, oinsá hatudu katak ema ho defisiénsia mós bele,” Diretór Nasionál Pessoa Portadora Defisiénsia, Domingos Henriques Maria, informa ba Agência Tatoli iha salaun MSSI, hafoin simu pose.
Defisiénsia fíziku na’in-rua hosi MSSI hamutuk ho Diretór Jerál, Nasionál, Xefe Departamentu Nasionál no Munisípiu simu pose direita hosi Ministra Solidaridade Sosiál no Inkluzaun, verónica das Dores.
Notísia relevante : Ministra Verónica husu dirijente foun tau importánsia ba interese povu
Nia konsidera, kargu ne’ebé ohin nia simu hatudu katak Governu hahú ona promove inkluzaun hodi tula knaar tu asegura no fó protesaun direitu ba ema ho defisiénsia sira.
“Durante ha’u-nia mandatu, hahú ona halo ezbosu dekretu-lei konsellu nasionál ba ema ho defisiénsia atu estabelese Konsellu Nasional ba Ema ho Defisiénsia. Dekretu-lei ne’e ita entrega ona ba Gabinete Jurídiku Ministra nian, entaun ha’u sei halo aprosimasaun ho Ministra no Vise-Ministra MSSI oinsá bele lori ba Konsellu Ministru hosi hetan aprovasaun,” nia akresenta.
Prioridade seluk mak semana oin sei halo enkontru avaliasaun ida kona-ba implemetasaun Planu Asaun Nasionál Ema ho Defisiénsia, ne’ebé sei envolve ministériu 11 hodi sai implementadór ba planu asaun ne’e rasik hodi hatene atinjimentu sira.
Domingos Henriques antes ne’e serbisu iha MSSI nu’udar funsionáriu ho responsabilidade hanesan pontu vogál ba planu no relatóriu Diresaun Nasionál ba Ema ho Defisiénsia nian.
“Ha’u-nia mensajen ba maluk defisiénsia mak MSSI hahú ona promove inkluzasaun fó kargu diresaun ba maluk defisiénsia, husu ita hamutuk kontinua proteje maluk ema ho defisiénsia,” nia hateten.
Iha fatin hanesan, Xefe Departamentu Administrasaun Rekursu Umanu, António José Aniceto Serrão, louva tebes ba Governu liuhosi MSSI tanba bele konsidera sira hodi fó kargu ba sira hodi asume.
“Buat ne’ebé MSSI halo ne’e hatudu katak promove duni ema ho defisiénsia, knaar ne’ebé ami simu la haree ba ami-nia kondisaun defisiénsia, maibé ami sei hala’o serbisu ida-ne’e ho responsabilidade hodi kontribui ba dezenvolvimentu nasaun,” nia tenik.
Antes ne’e António José Aniceto serbisu ona iha MSSI nu’udar funsionáriu desde 2004 iha Diresaun Asisténsia Umanitáriu, hodi kaer data base diresaun kona-ba sasán tama no sai.
“Ohin ha’u hetan kargu hanesan Xefe Departamentu, ida-ne’e atu hatudu ba maluk defisiénsia sira katak ita-nia difisiénsia iha fíziku maibé la’ós iha espíritu, nune’e maluk defisiénsia sira nafatin serbisu ho onestu, responsabilidade no labele tauk no moe, saida mak ita bele kontribui ba ita-nia nasaun,” nia fó hanoin.
Iha fatin hanesan, Ministra Solidaridade Sosiál no Inkluzaun, Verónica das Dores, hateten, promosaun ba maluk na’in-rua ne’e hodi hatudu katak MSSI la taka matan ba ema ho defisiénsia.
“Ita hakarak promove mós maluk defisiénsia sira, ne’ebé hatudu katak sira mós bele tanba ministériu ida-ne’e ko’ali kona-ba inkluzaun, entaun tenke aplika duni ka promove duni katak sira mós bele, husu ita hotu nia kontribuisaun hamutuk lori MSSI ba oin,” nia salienta.
Jornalista : Arminda Fonseca
Editora : Julia Chatarina
