iklan

COVALIMA, HEADLINE

Polítika desentralizasaun administrativa apoia dezenvolvimentu setór privadu iha área rurál

Polítika desentralizasaun administrativa apoia dezenvolvimentu setór privadu iha área rurál

Sekretáriu Estadu Dezenvolvimentu Lokál, Mateus dos Santos Tallo. Imajen Tatoli/Sérgio da Cruz.

COVALIMA, 07 marsu 2024 (TATOLI) –  Sekretáriu Estadu Dezenvolvimentu Lokál, Mateus dos Santos Tallo, hatete implementasaun polítika desentralizasaun administrativa parte ida atu apoia dezenvolvimentu setór privadu sira iha área rurál.

Mateus Tallo hatete katak dezentralizasaun administrativa konsagra ona iha Konstituisaun RDTL, nu’udar prosesu ida hodi transfere podér no responsabilidade husi administrasaun sentrál ba autoridade munisipál sira, hodi loke oportunidade ba partisipasaun komunidade nian, iha prosesu foti desizaun, nomós oinsa atu jere situasaun ka asuntu ne’ebé mak influénsia direta ba sira-nian populasaun, nune’e envolve mós sira iha prosesu dezenvolvimentu.

“Iha kontestu Timor-Leste, kuaze governasaun ida ba goversaun seluk deklara tiha ona desentralizasaun nu’udar polítika prióridade, tanba desentralizasaun konsidera nu’udar estratéjia ida di’ak liu hodi fó apoiu ba dezenvolvimentu setór privadu iha área rurál sira”, sekretáriu Estadu hatete iha ámbitu tomada pose ba Prezidente foun Autoridade Covalima, Miguel Armada Cardoso, iha salaun Autoridade Munisípiu Covalima, ohin.

Aleinde ne’e,  promove mós instituisaun Estadu ida forte, lejítimu no estavel iha territóriu hodi kria oportunidade partisipasaun demokrátika ba povu tomak no disponibiliza atendimentu públiku ida efetivu, efisiénte, no justu ba apoiu dezenvolvimentu sosioekonómiku

“Implementasaun polítika desentralizasaun administrativa iha ita-nian rai importante tebes hodi responde ba nesesidade espesiál iha kada munisípiu no asegura  komunidade hotu-hotu hetan asesu hanesan ba atendimentu públiku ida adekuadu no kualifikadu”, dehan.

Tanba ne’e, autoridade munisipál sei iha autonómia ida boot liu hodi dirije no jere rasik administrasaun, rekursu sira, no dezenvolve polítika ba área sira ne’ebe seidauk dezenvolve ho di’ak iha sira-nian rejiaun no kria oportunidade partisipasaun demokrátika ba povu tomak.

Governante ne’e salienta katak liuhusi transferénsia podér no rekursu sira ba munisípiu, Governu hahú ona inisiativa fó podér ba komunidade lokal sira hodi identifika rasik sira-nian nesesidade, potensialidade no prioridade, nune’e mós implementa solusaun ida adekuada tuir sira-nian realidade rasik.

Signika mós fortalese partisipasaun komunidade no estimula inovasaun no kreatividaide iha ámbitu dezenvolvimentu projetu no programa hirak ne’ebe sei kontribui ba hadi’a povu nia moris no kreximentu ekonómiku. Agronegósiu bele sai hanesan portaun estratéjiku ida ba Covalima hodi hamoris ekonomia. Ho kbi’it rai ne’ebé buras no bokur iha munisípiu ida ne’e, hanesan forsa potensiál ba produtu agríkola oioin”, nia reforsa.

Covalima ne’ebé iha mós poténsia ba plantasaun ai-teka, ai-ná, kamí, ai-kameli, nune’e mós kafé  iha  postu Maucatar, Fatululik, Fohorém no Fatumea no poténsia seluk hanesan pekuária nian mak karau vaka no timor, bibi malae no bibi timur

Iha mós poténsia peska husi postu Zumalai to’o Tilomar, autoridade Covalima bele transforma poténsia hirak ne’e sai munisípiu ida ho kreximentu ekonómiku ida di’ak liu no bele transforma rendimentu ba komunidade.

Nia sujete ba autoridade Covalima presiza mós halo estudu ida hodi identifika didi’ak poténsia ne’ebé  ezistente, estratéjia komersializasaun, formulasaun polítika advokasia, formasaun no asisténsia téknika, no estratéjia ba angariasaun fundu ba rekursu finanseiru sira hanesan banku no seluk tan, atu garante fundu ba dezenvolve ponténsia hirak ne’e.

“Kultur no rekursu Aambientá iha Covalima mós estratéjiku tebes, hanesan uma lulik/lisan, serimónia tradisionál, dansa kulturál sira, inklui fatin istóriku no área turístiku sira ne’ebé potente tebes ba Covalima hanesan destinu turístiku iha Timor-Leste no rejiaun”, realsa.

Munisípiu Covalima iha nia postu administrativu sira hanesan Fatumea, Fatululik, Fohorem, Tilomar, Maucatar, Suai no Zumalai ne’ebé iha nia suku 30 no aldeia 148.

Notísia relevante: PAM Covalima tau importánsia ba programa haat

Jornalista: Celestina Teles

Editora: Maria Auxiliadora

iklan
iklan

Leave a Reply

iklan
error: Content is protected !!