COVALIMA, 07 marsu 2024 (TATOLI) – Prezidente foun Autoridade Munisipál (PAM) Covalima, Miguel Armada Cardoso, hakarak prioriza programa haat durante nia mandatu ba períodu 2024 no 2028.
Programa haat ne’e mak hametin kultura liuhusi tara-bandu iha suku ida-idak ba revolusaun mentál hodi kria estabilidade, hametin amizade no konfiansa ba malu; funsiona serbisu estensionista iha suku hodi fó apoiu ba agrikultór sira; kontinua hatutan implementasaun programa Suai Suplay Base; no kontinua hadi’ak serbisu eis-administradór Covalima.
“Atu implementa programa hirak ne’e, ha’u sei halo reuniaun ho sekretáriu na’in-tolu atu fahe serbisu iha ida-idak nia área, nomós diretór munisipál sira nune’e bele serbisu ho di’ak liu”, Miguel Armada Cardoso hatete iha nia diskursu, ohin.
Aleinde ne’e , nia sei kria kalendáriu hodi halo vizita ba administrasaun postu hitu no suku 30 ne’ebé pertense ba munisípiu Covalima no sei hamutuk ho komandante Polísia Nasionál Timor-Leste (PNTL) hodi kria amizade no buka soluasaun ba problema ne’ebé akontese.
Iha 2024 , orsamentu ne’ebé autoridade Covalima hetan husi Governu sentrál hamutuk millaun $7,3 ne’ebé aloka ba saláriu no vensimentu millaun $2,3, bens no servisu $846.885, tranferénsia públika millaun $2,6, kapitál menór $166.820 no kapitál dezenvolvimentu millaun $1,4.
Orsamentu tinan ne’e ba Covalima atu finansia programa 13, sub-programa 31 ho atividade 74, tuir planu asaun anuál ne’ebé aprezenta husi kada diresaun servisu munisipál sira.
Notísia relevante: Miguel Armada Cardoso asume knaar nu’udar PAM Covalima
Jornalista: Celestina Teles
Editora: Maria Auxiliadora
