DILI, 08 marsu 2023 (TATOLI)–Xefe Departamentu Saneamentu iha Autoridade Munisipal Dili (AMD), Domingos dos Santos Soriano, hateten Autoridade Munisipiu Dili kontrata hela empreza China Harbour sei koloka kaixote lixu 7.000 iha estrada públika sira iha kaiptál Dili.
Notósia Relevante: Planu instala fatin lixu 4000 iha Dili tama ona prosesu aprovizionamentu
Objetivu hodi koloka kaixote lixu iha estrada públika no besik komunidade nia hela fatin atu fasilita traballadór raut flixu sira bele foti-sa’e automatikamente kaixote lixu no fakar rasik ba kamionete lixu nian.
“Tuir kontratu ne’e hamutuk 7.000 ne’e koloka iha ba estrada públiku, jardin no oferese ba komunidade atu soe foer depois ita foti,” Xefe Departamentu Saneamentu iha Autoridade Munisipal Dili, Domingos dos Santos Soriano, hateten ba Agência Tatoli, iha Matadouru, sesta ne’e.
Governu instala ona fatin lixu iha estrada públiku sira-ne’e, nune’e AMD sei foti kaixote lixu ne’ebé agora daudaun rai hela iha Caicoli ne’e, hodi koloka iha fatin lixu ne’e hodi ema soe lixu iha laran no hein kamioneta foun sira-ne’e ba foti rasik no fakar tama kamioneta laran.
Nia garante kata ho maneira ida-ne’e sei tulun hodi aselera foti lixu iha lixeiru hirak ne’ e, tanba kamioneta mak sei hiit sa’e diretamente kaixote lixu hirak ne’e, hodi fakar lixu ba kamioneta nia laran.
Xefe departamentu ne’e hateten, konstrusaun ba lixeiru iha dalan públiku no besik komunidade ne’e hanesan preparasaun ida ba operasaun kamioneta lixeiru foun munisipiu Dili nian, hodi foti lixu iha kapital ba soe iha kontrolu ateru Tibar.
Nia informa, orsamentu ba konstrusaun lixeira ne’e hamutuk millaun $7,5 ne’ebé implementa hosi empreza China Harbour.
“Orsamentu ne’e hetan apoiu hosi Banku Dezenvolvimentu Aziátika (ADB, sigla ingles),” nia dehan.
Jornalista : Jesuína Xavier
Editór : Cancio Ximenes
