OÉ-CUSSE, 08 marsu 2024 (TATOLI) – Prezidente Autoridade Rejiaun Administrativa Espesiál Oé-Cusse Ambeno (RAEOA), Rogério Tiago Lobato, fó sai, autoridade seidauk halo pagamentu ba reabilitasaun estrada nasionál liga sub-rejiaun Nítibe no Oésilo, tanba konsidera valór orsamentu kontratu aas liu.
Notísia relevante: Projetu estrada nasionál hosi Pante Makasar ba Nítibe atinje 46%
Entretantu, projetu reabilitasaun dahuluk, hahú hosi ponte Noefefan, suku Lifau, envolve suku Taiboko, sub-rejiaun Pante Makasar to’o Oénunu, suku Suni-Ufe, sub-rejiaun Nítibe.
Projetu ne’e Autoridade sesante, hahú halo lansamentu iha loron 19 agostu 2022 ho distánsia kilómetru 11 hanesan pakote I, ezekuta hosi kompañia estatál Indonézia PT. Waskita Karya, ho valór millaun $23, autoridade RAEOA prevee hosi Orsamentu Jerál Estadu (OJE) 2022 ho durasaun servisu fulan 18.
Reabilitasaun daruak, hahú hosi eis merkadu Tono, suku Cunha, sub-rejjiaun Pante Pante Makasar to’o fronteira Napan, suku Bobometo, sub-rejiaun Oésilo ho distánsia kilómetru 18,.
Notísia relevante: Waskita Karya sei ezekuta projetu estrada nasionál Pante Makasar-Oésilo ho millaun $33-resin
Projetu ne’e, autoridade sesante, hahú halo hatur fatuk dahuluk iha loron 16 maiu 2023, Waskita Karya ezekuta ho valór kontratu $33,915,000.00, orsamentu ne’e Autoridade RAEOA prevee hosi Orsamentu Jerál Estadu (OJE) 2023 ho durasaun servisu durante tinan rua.
“Ami seidauk bele selu tanba sei halo re-avaliasaun hosi ADN, tanba folin ne’ebé atu halo estrada sira-ne’e aas liu, ne’e duni bainhira ADN haree, katak loos ona fó justifikasaun entaun mumentu ida-ne’e maka komesa halo pagamentu,” Rogério Tiago Lobato, ko’alia ba komunidade sira iha sub-rejiaun Nítibe, kinta ne’e.
Nia informa, planu Autoridade hakarak kontinua tán estrada nasionál rua ne’e, hosi Oénunu to’o fronteira Citrana, nune’e mós hosi Oésilo ba to’o sub-rejiaun Pássabe.
“Bainhira ita halo daudaun estrada ida-ne’e, molok fulan jullu 2024, ha’u sei ba ko’alia ho Primeiru Ministru, tanba nia mak tutela RAEOA, halo proposta ida, atubele loke estrada hosi Oénunu mai to’o iha Baoknana.”
Nune’e nia apela, kontinua servisu hamutuk, tau matan ba obra sira-ne’ebé Autoridade sesante halo ona, obra hirak-ne’e harii ho osan Estadu, osan povu nian.
“Ha’u sente katak, dalan ida-ne’e sei loke ba to’o iha leten, hosi fali Nítibe tuan, loke ba Pante Makasar, hosi Nítibe loke ba Oésilo no kontinua ba Pássabe tanba estrada maka negósiu no atividade seluk bele la’o ho di’k, ne’e duni ita tenke investe,” nia promete.
Notísia relevante: OJE 2024, RAEOA ezekuta 4% maioria paga saláriu no vensimentu
Jornalista: Abílio Elo Nini
Editór: Evaristo Soares Martins
