OÉ-CUSSE, 29 setembru 2023 (TATOLI) – Prezidente Autoridade Rejiaun Administrativa Espesiál Oé-Cusse Ambeno (RAEOA), Arsénio Paixão Bano, informa, konstrusaun estrada nasionál pakote I ho distánsia kilómetru 11 hahú hosi Ponte Noefefan, sub-rejiaun Pante Makasar liga ba sub-rejiaun Nítibe to’o suku Suni-Ufe progresu fíziku atinje ona pursentu 46%
“Iha segunda ne’e ha’u rasik ba haree, servisu la’o maka’as, ita konfirma ho parte tékniku sira, katak nia servisu ne’e kuaze atinje ona 46%,” Arsénio Paixão Bano, ba Tatoli liuhosi watshaap, sesta ne’e.
Notísia relevante: Estrada nasionál Noefefan-Nítibe atinje 34%
Nia informa, estrada nasionál ne’e hahú hosi ponte Noefefa to’o iha Oénunu, kompañia sei harii ponte lima inklui ponte kiik sira balu.
“Ita ba fiskaliza ne’e ita husu tékniku sira iha Waskita Karya, promete iha fulan novembru bele finaliza, liuliu ponte primeiru iha Kolomboe no mota Oénunu tanba cast bridge (corang) hotu ona,” nia katak.
“Agora seidauk fui alkatroada parese semana oin, konta ho preparasaun ba ponte sira, no agora hosi kompañia prepara kondisaun ba estrada atu fui alkatroada, ne’ebé iha outubru ne’e bele fui ona,” nia informa.
Autoridade sei halo kompensasaun fazeadamnete ba rai afetadu sira no oras ne’e autoridade RAEAOA harii uluk uma ba afetadu sira hamutuk 36 atu konstrui uluk ba komunidade afetadu sira, faze tuir mai sei kompleta ba uma 120, tanba osan prevee ona, maibé kona-bá plantasaun agora kompensasaun la’o hela.
Notísia relevante: RAEOA lansa pagamentu ba plantasaun ne’ebé afeta projetu ZEESM
Projetu ne’e Autoridade RAEOA, hahú halo lansamentu iha loron 19 agostu 2022 ba distánsia kilómetru 11 hanesan pakote I, hahú hosi ponte Noefefan, suku Lifau, envolve suku Taiboko, sub-rejiaun Pante Makasar to’o Oénunu, suku Suni-Ufe sub-rejiaun Nítibe.
Projetu realibitasaun estrada nasionál, kompañia estatatál Indonézia PT. Waskita Karya, ezekuta ho valór kontratu millaun $23, autoridade RAEOA prevee hosi Orsamentu Jerál Estadu (OJE) 2022 ho durasaun servisu fulan 18.
Notísia relevante: Autoridade RAEOA harii uma 36 troka uma tali
Jornalista: Abílio Elo Nini
Editór: Evaristo Soares Martins
