OÉ-CUSSE, 26 juñu 2023 (TATOLI) – Prezidente Autoridade Rejiaun Administrativa Espesiál Oé-Cusse Ambeno (RAEOA), Arsénio Paixão Bano, informa, konstrusaun estrada nasionál pakote I ho distánsia kilometru 11 hahu hosi Ponte Noefefan, sub-rejiaun Pante Makasar, liga ba sub-rejiaun Nítibe to’o suku Suni-Ufe, progresu fíziku atinje ona pursentu 34 no tuir planu kompañia sei fui alkatroada iha fulan setembru 2023 ne’e.
“Estrada nasionál ba Ponte Noefefan nian, iha semana kotuk ha’u ba vizita atinje ona 35%, Ne’e maka agora ita prepara uma, uma ne’e sei harii uluk 34, sira seluk atu prienxe ba 120 uma ne’e sei iha faze tuir mai,” Arsénio Paixão Bano, ba jornalista sira iha Oé-Cusse, segunda ne’e.
Notísia relevante: PA RAEOA lansa ponte dahuluk ba estrada nasionál Pante Makasar-Nítibe
Autoridade sei halo kompensasaun fazeadamente, neste mumentu autoridade RAEAOA prepara ona uma 34 atu konstrui uluk ba komunidade afetadu sira-ne’ebé afeta, maibé kona-bá rai Autoridade RAEOA sei konfirma ba Governu Sentrál atu faslita mós títulu ba rai.
“Kompensasaun ne’e, antes nian mós tama hotu, ita hein prosesu ne’e kuandu ita-bele selu, ema hetan kompensasaun ne’e hetan mós títulu ba rai, ida-ne’e mak halo ita kleur uitoan, intermu orsamentasaun, RAEOA orsamenta atu selu rai afetadu sira,” nia informa.
Antes ne’e autoridade selu ona ba rai afetadu sira iha melloramentu estrada rurál hosi sub-rejiaun Pássabe, suku Malelat mai suku Ban-Afi iha aldeia Kusi, kona-bá ai-horis liu-liu produtiva sira.
“Maibé rai ne’e, ita tenke koopera ho Diresaun Nasionál Terra Propriedade, mapeamentu ho diresaun sira iha Oé-Cusse, osan ita-bele iha, maibé kuandu prosesu ne’e la la klaru, ita tenke hein uitoan, maibé ida-ne’e tama hotu inklui afetadu sira antes hosi fronteira Sakato, suku Nípani ba to’o ponte Noefefan,” nia katak.
Notísia relevante: Autoridade RAEOA aprova deliberasaun halo pagamentu ba afetadu projetu ZEESM
Jestór projetu PT. Waskita Karya, Pertu Yustian Franjani, afirma, neste mumentu kompañia esforsa atu finaliza ponte sira, tanba tuir planu sei hahú fui alkatroada iha fulan setembru tinan ne’e.
“Progresu to’o maiu ne’e atinje 33,19%, iha juñu ne’e ita seidauk update tanba ita update nia progresu ne’e kada fulan, ne’ebé servisu iha terrenu ita hahú prepara atu fui alkatroada, tanba tuir planu sei hahú iha fulan-setembru tinan ne’e, agora ita foku ba ponte sira tanba tempu bailoron, bainhira tempu udan, bele estraga konstrusaun, ne’ebé ponte lima hahú konstrui ona estandar sei remata ita kontinua kedan ba fui alkatroada,” nia katak.
Nia informa, durante ne’e dezafiu ne’ebé kompañia Waskita infrenta iha térrenu, servisu ho fazeadamnete tanba kinta no natar balu sei iha problema, tanba iha área seluk sei prosesu negosiasaun ho parte Governu liga ba kompensasaun nian ba komunidade nia sasán.
“Tan ne’e ita esforsa buka área ne’ebé rezolve ona ita bele hahú servisu, maibé área ne’ebé sei iha disputa nia laran, ita husik lai, tanba materiál ba konstrusaun estrada nasionál ne’e laiha problema,” nia katak.
Projetu ne’e Autoridade RAEOA, hahú halo lansamentu iha loron 19 fulan-agostu 2022 ba distánsia kilómetru 18 hanesan pakote I, hahú hosi ponte Noefafan, suku Lifau, envolve suku Taiboko, sub-rejiaun Pante Makasar to’o Oénunu, suku Suni-Ufe, sub-rejiaun Nítibe.
Projetu realibitasaun estrada nasionál, kompañia estatatál Indonézia PT. Waskita Karya, ezekuta ho valór kontratu millaun $23, autoridade RAEOA prevee hosi Orsamentu Jerál Estadu (OJE) 2022 ho durasaun servisu fulan 18.
Notísia relevante: Estrada nasionál Pante Makasar-Nítibe sei kompleta ho ponte lima
Jornalista: Abílio Elo Nini
Editór: Evaristo Soares Martins
