VIQUEQUE, 08 marsu 2024 (TATOLI)-Comunity Bassed Rehabilitations Network Timor Leste (CBRNTL) ho autoridade lokál postu Lacluta, sesta ne’e selebra loron internasionál feto iha postu Lacluta, munisípiu Viqueque.
Tema komemorasaun ba tinan 2024 mak “Konta ho nia ‘IHA’ aseleira igualidade jenéru husi empoderamentu ekonómia”.
Objetivu ba selebrasaun atu aumenta lian ema ho kondisaun defisiénsia no feto sira seluk lihosi asegura no konsidera sira nian abilidade hodi kontribui ba dezenvolvimentu.
Iha selebrasaun ne’e, Diretóra Ezekutivu CBRNTL, Norberta Soare, hatete loron ida-ne’e sai loron espesiál ba feto Timor- Leste tomak.
“Tanba dala barak ema hanoin feto la halo buat ida, feto laiha kapasidade, maibé selebrasaun loron intermasionál feto ida-ne’e atu rekoñese katak feto bele halo buat hotu. Nune’e loron ne’e atu motiva feto sira atubele hatudu sira-nia kapasidade no abilidade sira”, hatete Norberta Soares, liuhusi nia diskursu abertura workshop ba selebrasaun loron internasionál feto, iha salaun Santo António Lacluta, ohin.
Organizasaum CBRNTL durante ne’e akompaña ema ho kondisaun defisiénsia sira iha Timor Leste.
“Maske sei hasoru bareira iha família no sosiadade nian le’et, maibé hanesan feto iha oportunidade atu ultrapasa hodi hakotu bareira sira-ne’ebé iha família no sosiadade. Ho selebrasaun ida-ne’e hodi refleta ba dezáfiu sira ho hanoin ne’ebé inovativu”, Norberta akresenta.
“Mai ita hanoin katak empoderamentu feto ho kondisaun defisiénsia no feto la’ós difisiénsia hamutuk hodi halo mudansa ba feto. Ha’u enkoraja feto sira hodi hatudu abilidade hodi partisipa iha empodera ekonómia iha nasaun Timor Leste”.
Iha fatin hanesan, Xefe Suku Dilór, Jacinto Ximenes, agradese ba organizasaun CBRNTL ne’ebé deside komemora loron internasionál feto iha postu Lacluta hodi partilla informasaun ba feto sira tanba sira menus informasaun.
“Ha’u husu agradese ba CBRNTL ne’ebé deside selebra loron internasionál feto iha postu Lacluta hodi partila partisipasaun feto iha prosesu dezenvolvimentu. Tanba ita hatene katak papél feto mós importante. Ho selebrasaun ida-ne’e ita bele empodera feto sira liuliu ba asuntu ekonómia hodi hadi’a moris”, nia subliña.
Tuir observasaun Agência TATOLI nota katak feto postu Lacluta entuasizmu partisipa workshop ba komemorasaun loron internasionál feto to’o ramata.
Eventu ba komemorasaun selebrasaun loron internasionál ba feto ne’e organiza husi CBRNTL no hetan apoia husi The Asia Fundation, OXFAM, USAID no seluk tán.
Iha workshop ba selebrasaun ne’e hetan partisipa husi abitante sira husi suku haat hanesan Uma Tolu, Dilór, Ahic no Laline no hetan partisipasaun Polísia Nasionál Timor Leste (PNTL) Eskuadra Lacluta, autoridade lokál no estudante postu Lacluta.
Notísia relevante: Loron Mundiál Feto: PN promove partisipasaun feto iha foti desizaun
Jornalista: Vitorino Lopes da Costa
Editór : Florencio Miranda Ximenes
