DILI, 08 marsu 2024 (TATOLI)–Dekanu Fakuldade Agrikultura iha Universidade Nacional Timor Lorosa’e (UNTL), Vicente de Paulo Correia, husu MESSK, José Honório Jerónimo, atu rezolve problema esutdante foun ba fakuldade agrikultura 700 ne’ebé liu teste, maibe estudante barak mak la mai rejistu iha UNTL.
Notísia Relevante: UNTL no IPB submete ona dadus estudante foun 5.120 ba MESSK
“Estudante ba fakuldade agrikultra UNTL ba tinan ne’e loloos hamutuk 700, maibé ema 400 mak rejistu no 300 la mai rejistu,” Dekanu Fakuldade Agrikultura ne’e hateten ba Agência Tatoli, iha nia kna’ar fatin, Kampus Sentrál, sesta ne’e.
Tanba ne’e, nia husu ba ministra edukasaun atu rezolve problema refere tanba estudante hirak ne’ebé manán tiha ona, maibé la mai halo inskrisaun ne’e aktu ida atu taka dalan ba ema seluk ne’ebé iha vontade atu eskola.
“Ida-ne’e, Ministériu Edukasaun seidauk rezolve no laiha solusaun. Husu ministra edukasaun tenke hadi’a sistema ne’e,” nia hateten.
Aleinde ne’e, nia hateten, prosesu simu estudante foun iha UNTL ne’e mós hamosu implikasaun ba prosesu aprendizajen, tanba kada tinan ne’e prosesu aprendizajen iha UNTL sempre la’o tarde hela de’it.
“Onestu de’it, prosesu simu ita-nia estudante foun ne’e iha implikasaun boot. Tanba uluk prosesu simu estudante foun ne’e Universidade Nacional Timor-Leste (UNTL) mak responsabiliza, klaru katak iha problema balun maibé ita hadi’a ida-ne’e. Agora liuhosi teste la’ós buka valór boot mak mai entaun kada tinan presesu aprendizajen tenke tarde hanesan tinan ne’e, foin mak hahú orientasaun,” nia dehan.
Tuir loloos, tuir kalendáriu ne’ebé mak iha katak prosesu aprendizajen ba estudante foun anu letivu 2024 nian ne’e hahú kedas iha 28 fevereiru maibé ikus atrazu tebes.
“Sira mak simu tiha, ami mak terus la halimar. Tanba, kalendáriu ne’ebé iha prosesu aprendizajen ne’e hahú iha 28 fevereiru maibé ita foin mak orientasaun. Ida-ne’e implika ba semestre. Ita levanta maibé ema la sente. Ami iha UNTL agora hanorin ema-ne’e defísil tebes tanba estudante mai valór boot mak tama maibé laiha garante tanba valór ne’e ita mak halo no fó,” nia hateten.
Nia dehan, buka estudante ho valór boot maibé dosente sente todan la halimar tanba iha estudante balun lee no hakerek lahatene, tanba ne’e se bele fó fali UNTL mak halo jestaun mak hamutuk hodi kontrola buat balun no hamutuk hadi’a.
“Ha’u hanesan dekanu hateten planu rekrutamentu ne’e ladi’ak. Ita haree kedas kualidade ne’ebé la hanesan ho uluk. Tanba dalaruma ita hanorin no esplika maibé estudante nunka komprende halo ita ulun moras. Ida-ne’e mós kauza hosi rejime espesiál ne’ebé sai mós problema ba dosente ne’ebé hanorin ne’e. Ministériu simu loos de’it maibé buat fukun boot ida ami mak todan no lori. Ema lahatene katak ami auguenta ho problema sira-ne’e,” nia dehan.
Atu di’ak-liu, nia dehan, liuhosi teste mak asesu ba UNTL duké buka valór boot depois ikus mai halo ulun moras.
Kona-ba edifísiu Fakuldade Agrukultura, Dekanu krítika ba obra ne’e tanba estudante fakuldade agrikultura atu halo orientasaun ona maibé bee mós laiha, eletresidade inklui fasilidade eskola nian mós laiha.
“Ida-ne’e ha’u krítika tanba estudante fakuldade agrikultura atu halo orientasaun ona maibé bee laiha, eletresidade inklui fasilidade eskola nian mós laiha. Parte adminitrasaun Jerál UNTL halo retensaun tinan ida. Ida-ne’e mós di’ak maibé projetu ida tenke iha kualidade labele ansi inaugura depois mak nakfera fali. Ida-ne’e ha’u la hatene projetu saida nian mak ne’e,” nia dehan.
Agora, estudante foun ba tinan 2024 hamutuk 400 ne’ebé atu tuir orientasaun maibé bee ho eletrisidade laiha ne’e halo oinsá, no sira dehan atu tau trafo maibé to’o agora seidauk iha no orientasaun mós la’o daudaun ona.
“Entaun iha orientasaun ne’e ami hakarak hatudu duni katak laiha kondisaun, ne’ebé labele hanoin muda ami arbiru mak ne’e. Presiza iha kondisaun ne’ebé di’ak kompleta ho fasilidade hanesan karteira eskolár, komputadór inklui infraestrutura bázika sira, la’ós ansi inaugura depois públiku kestiona. Tanba estudante barak mak uza edifísiu mak buat hotu-hotu laiha ne’e, halo ita triste,” nia dehan.
Nia rasik ba halo observsaun katak edifísiu nia finishing mak ansi utioan, entaun atu dehan kuandu estudante sei la ba.
“La prontu mak ha’u-nia emar sira sei la ba. Ne’e ha’u dehan kedas ona no agora orientasaun ne’e ami halo de’it iha laran nune’e ema hotu haree. Buat hotu kompleta mak entrega, ansi loos. Fasilidade tenke kompletu,” nia dehan.
Dosente fakuldade agrikultura hamutuk 50-resin no iha na’in 10 mak daudaun ne’e kontinua estudu doutoramentu nian, sala-de-aula ba estudante sira iha 30-resin no tolu mak uza ba administrasaun no sala ba dosente nian no sala tolu ne’e pinta sala hotu, ho totál estudante ativu besik 3.000.
Jornalista : Osória Marques
Editór : Cancio Ximenes
