DILI, 09 Maiu 2026 (TATOLI)—Ekipa Korpu Isár Bandeira Nasionál (CIBN), hahú halo preparasaun hodi fó treinamentu ba estudante husi eskola 13 iha Dili laran, atu sai Korpu isár Bandeira iha serimónia restaurasaun independénsia 20 Maiu 2026 ba da-XXIV iha Tasi-Tolu.
Notísia Relevante: Governu aprova tema ba selebrasaun Restaurasaun Independénsia RDTL ba da-24
Preparasaun ne’e hala’o husi ekipa ne’ebé kompostu husi FALINTIL-Forsa Defeza Timor-Leste (F-FDTL) no CIBN, ne’ebé hahú kedas iha 01 Maiu to’o ohin loron, kontinua fo treinamentu oinsá kapasita estudante ba área hanesan lulun, hikar, kesi, dada no loke bandeira RDTL no oinsa taka formatura iha korpu espesiál.
Koordenadór Korpu Isár Bandeira Nasionál (CIBN), Aurendino Afonso dos Santos, hateten atu tama iha korpu Isár Bandeira tenke prenxe rekezitu hanesan altura no fíziku.
“Ita halo rekrutamentu ba estudante husi ensinu sekundáriu sira iha Dili laran, ne’ebé kada estudante na’in-10 hodi halo teste fíziku no haree ba nia altura. Ezemplu, feto tenke iha altura 162 no mane 167. Nune’e, ita hili na’in-lima iha kada eskola sekundária,” Koordenadór CIBN ne’e hateten ba Agência TATOLI, iha Tasitolu, sábadu ne’e.
Atuál Xefe Departamentu Planeamentu iha diresaun Nasionál Planeamentu no Avaliasaun, Ministériu Administrasaun Estatál ne’e hatutan, estudante selesionadu ba serimónia 20 Maiu 2026 hamutuk 75 ne’ebé kompostu husi mane 37 no feto 38, inkluindu ema ho nesesidade espesiál feto no mane ida.
Ekipa Korpu Isár Bandeira ba parte dadeer nian hamutuk na’in-lima (5) hanesan Aime L. X. dos Reus (Voz Komandu) husi Eskola Sekundária São Miguel, Givio da silva dos Santos (kesi Bandeira) husi Eskola São Miguel, Febiano X. Soares Santos (Dada tali Bandeira) husi Eskola Sekundária São Paulo, Cerrela S. M. Hornay Scran (Escolto Corpo) Eskola Amigo de Jesus no Jesuintra C. Gama Ximenes (Simu Bandeira) Eskola Sekundária 12 Novembru.
Enkuantu, ekipa parte lorokraik nian mak Adelina Soares D. Marques (Entrega Bandeira) husi Eskola Sekundária São João Paulo, Lucia Araújo S. Gouveia Leite (Escolta Corpo) husi Eskola Sekundária 4 Setembru UNAMET Balide, Samuel da Costa Xavier (Voz Comando) husi Eskola Sekundária Kristal, Fidel Zagalo Espirito Santo (kore Bandeira) husi Eskola Sekundária São João Paulo no Noel 5. da Silva Guterres (Assegura tali Bandeira) husi Eskola Sekundária Jerál.
Estudante hosi Eskola Sekundária 13 mak hanesan Eskola Sekundária Amigo de jesus, Sagradu Coração de jesus, São João Paulo II, São Miguel Arcanjo, São Pedro, Externatu São José, Eskola Sekundária Nicolau Lobato, Eskola Sekundária Kristal, Eskola Sekundária AN-NUR, Eskola Sekundária Públiku 04 Setembru UNAMET Balide, 10 Dezembru, 12 Novembru no 5 de Maio.
Iha sorin seluk, Sekretáriu Jerál ba Komisaun Organizadór ba eventu 20 Maiu 2026, Angelo Urbano Fernandes, hateten serimónia ba selebrasaun Loron Restaurasaun Independénsia 20 Maiu 2026 ne’e hala’o simples tanba ho limitasaun orsamentu.
“Ita akompaña ho situasaun polítika rai-li’ur ne’ebá entaun ita-nia serimónia ba 20 Maiu halo simples de’it. Nune’e, ita laiha atividade desportu maibé ita atividade konsertu muzikál ne’ebé sei anima husi artista nasionál hahú husi 17-20 Maiu,” Atuál Diretór Jerál Servisu Kooperativa dehan.
Kona-ba lojistika, nia dehan, agora parte lojistika nia mak ekipa hahú ona monta tenda iha Tasi-Tolu, nune’e bainaka Verry Important Person (VIP) no komunidade mai tuur hodi asiste Isár bandeira Nasionál.
“Ita totál globál orsamentu ne’e hamutuk millaun ida-resin inklui ona ho eventu 30 Agostu loron konsulta populár, 28 Novembru loron proklamasaun independénsia no 31 Dezembru loron eroi sira-nian,” nia informa.
Antes ne’e, Prezidente Komisaun Organizadór Serimónia Içar Bandeira 20 Maiu 2026, Atuál Ministru Administrasaun Estatál, Tomás Cabral, hateten bainaka importante husi nasaun Portugál, Austrália no Indonézia mak sei partisipa iha loron restaurasaun independénsia ba dala XXIV.
Tuir observasaun jornalista TATOLI iha terrenu nota katak ekipa Komisaun Organizadór hahú ona monta tenda, sunu lixu iha área besik isár bandeiera no kamioneta hahú tula lixu hodi ba fakar iha lixeira Tibar.
Notísia Relevante: MAE konfirma Selebrasaun 20 Maiu hala’o iha Tasi-Tolu
Jornalista : Osória Marques
Editór : Cancio Ximenes
