Estrutura PN lejislatura daneen sai modelu ba promosaun reprezentasaun feto
DILI, 08 marsu 2024 (TATOLI)—Prezidente Grupu Feto Parlamentár (GMPTL, siglá portugés), Deputada Aliança da Conceição, apresia estrutura Parlamentu Nasionál (PN) iha lejislatura daneen sai modelu ba promosaun reprezentasaun feto.
Notísia Relevante: Loron Mundiál Feto: PN promove partisipasaun feto iha foti desizaun
“PN nu’udar órgaun soberania reprezenta sidadaun timoroan tomak, tuir termu artigu 92 konstituisaun, bele sai modelu promosaun partisipasaun demokrátika hosi feto. Iha lejislatura ida-ne’e ita iha Deputadu iha PN na’in 24 ho persentajen 36,9%, garante iha loron aban persentajen ne’e sei aumenta,” Prezidente GMPTL, Deputada Aliança da Conceição, hato’o iha nia diskursu iha ámbitu komemorasaun loron internasionál feto iha PN, sesta ne’e.
Loron 08 marsu nu’ udar loron mundiál ba feto nu’udar loron komemorativa hanesan luta ba igualidade jéneru no rekoñesimentu importante kontribuisaun feto ba sosiedade ida-ne’e justa iha Estadu direitu demokrátiku.
Ho kompromisu ne’ebé estabelese iha lei TL, fundamentál fó importánsia refere mós momentu agora okupa prestíjiu kargu Prezidente PN lidera hosi feto ida nu’udar sai feto dahuluk ezerse funsaun ne’e iha Timor-Leste, nune’e laiha dúvida motivu no orgullu ba Estadu realmente ho mudansa ne’ebé iha.
Ho kompeténsia no responsabilidade hodi kontinua avansa no alkansa igualidade jéneru no fortalese feto no labarik feto, tuir Objetivu Dezenvolvimentu no Sustentável (ODS) ‘alkansa igualidade jéneru no empodera feto no labarik feto.
Nune’e, iha komemorasaun loron internasionál ohin espesiál tebes ba feto hotu, ne’ebé iha korajen luta no proteje direitu ne’ebé fundamental iha lei garante, no proibi kualker forma diskriminasaun ne’ebé previstu iha artigu 16 no 17 iha konstituisaun no konvensaun ba eliminasaun forma diskriminasaun hotu kontra feto ne’ebé PN ratifika iha tinan 2002.
Iha komemorasaun loron internasionál feto tinan ne’e, PN hili ho tema “Garantir no Investir no Fortalecimento Económico das Mulheres Timorenses para o Desenvolvimento’.
Hanoin tema ne’e esensiál promosaun fortalesimentu ekonómiku ba feto, ho objetivu proporsiona kapasidade finanseira ba feto timoroan liuliu sira-ne’ebé vulnerável.
Ho ida-ne’e, fó atensaun makaas ba feto sira iha produsaun tais ka soru tais, kontempla valór ekonómiku tais ne’ebé lori rendimentu ba família timoroan no potensiál, hodi valoriza iha futuru sai iha komérsiu nível nasionál, interansionál no turizmu.
Importante tebes mak PN liuhosi nia rezolusaun númeru 2/2022, 26 janeiru, institui loron nasionál Tais no aprova rekomendasaun ba Governu hodi fó protesaun no prezervasaun tais, aleinde ne’e fortalese ekonomia ba feto timoroan liuhosi produsaun tais ka soru tais ne’ebé sei kontribui sira ninia nível ekonómiku.
Tanba ne’e, Deputada ne’e solisita Sekretária Estadu Arte no Kultura (SEAK) atu implementa rekomendasaun hosi PN hodi prezerva no promove Timor-Leste patrimóniu kulturál immaterial iha mundu.
Niha husu Sekretária Estadu Igualidade (SEI) atu kontinua kolabora hamutuk ba promove direitu feto iha aspeitu hotu, hanesan iha nível ekonómiku iha kontextu fortalesimentu ba feto iha produsaun tais.
Ho loron internasionál feto, Prezidente GMPTL ne’e konsidera hanesan momentu unidade no solidariedade entre feto no momentu reflesaun kona-ba luta no konkista feto hotu nian iha Timor-Leste nia istória.
“Nune’e kontinua mantein amizade, hodi luta ba defeza ita-nia direitu no luta direitu ba sira-ne’ebé vulnerável liu,” nia dehan.
Jornalista : Nelson de Sousa
Editór : Cancio Ximenes
