iklan

COVALIMA, HEADLINE

PAM Covalima presiza hadi’ak jestaun ba tratór hodi ajuda agrikultór sira

PAM Covalima presiza hadi’ak jestaun ba tratór hodi ajuda agrikultór sira

Tratór avaria iha sentru tratór Sanfuk. Imajen Tatoli/ Celestina Teles.

COVALIMA,  08   marsu  2024 (TATOLI) – Sekretáriu Estadu Dezenvolvimentu Lokál, Mateus dos Santos Tallo, husu ba Prezidente Autoridade  Munisipál (PAM) Covalima, Miguel Armada Cardoso, atu hadi’a jestaun operasionál ba kombustivel no tratór sira hodi tulun agrikultór sira iha Covalima.

“Ha’u atu informa, iha ne’e, populasaun barak mak kestiona ita-boot sira-nian serbisu. Ha’u rona direta bainhira iha vizita, realidade hatudu iha buat barak falla iha tinan kotuk no labele atu kontinua. Ha’u sei enkontru atu ko’alia kona-ba asuntu hirak ne’e”, governante afirma iha Tabakolot, ohin.

Nia dehan, tuir ba Dekretu-lei númeru 84/2023, 23 marsu, fó kompeténsia ba Prezidente Autoridade Munisipál (PAM) ho nia estrutura atu hala’o nia funsaun, tanba ne’e tenke mellora jestaun operasionál sira liga ba atendimentu agrikultór loroloron, liuliu halo jestaun ba konbustivel no tratór atu ema labele uza ba nia intrese de’it.

“Ita sei haree relatóriu no serbisu sira ne’ebé ba duni povu nia nesesidade ne’e tenke jere ho di’ak”, nia salienta.

Governante ne’e mós informa katak, iha tersa semana oin, sei lansa relatóriu peskiza ida atu identifika preparativu sira ba dezenvolvimentu komunitáriu hodi ajuda líder lokál sira-nian planu atu ajusta ba demografia, nomós sei halo revizaun ba planu estratéjiku dezenvolvimentu munisipál.

Prezidente Autoridade Munisipál, Miguel Armada Cardoso, hatete iha asuntu barak mak sai hanesan traballu ida oinsá bele halo jestaun ho di’ak liu.

Diretór Servisu Agrikultura Covalima , Lino Magno, relata katak iha Sentru Tratór Sanfuk iha ekipamentu pezadu unidade  30.  Husi númeru ne’e tratór lima halo ona leilaun foin lalais iha époka dahuluk iha 2023 no sei iha tratór 25, maibé husi tratór sira ne’e sia de’it mak bele halo operasaun tanba restu avaria totál.

Notísia relevante: Tratór ualu iha Sentru Sanfuk avaria maka difikulta serbisu iha époka daruak

Jornalista: Celestina Teles

Editora: Maria Auxiliadora

iklan
iklan

Leave a Reply

iklan
error: Content is protected !!