iklan

NASIONÁL, HEADLINE

PAM Mélio de Jesus hakarak transforma Lautém sai munisípiu pró-ativu no kompetitivu

PAM Mélio de Jesus hakarak transforma Lautém sai munisípiu pró-ativu no kompetitivu

Vise-Ministru Administrasaun Estatál, Jacinto Rigoberto Gomes de Deus, fó pose ba Mélio de Jesus, nu’udar PAM Lautém, segunda (05/03/2024). Imajen/Espesiál

DILI, 08 marsu 2024 (TATOLI)Prezidente Autoridade Munisípiu (PAM) Lautém, Mélio de Jesus, hakarak transforma Lautém sai munisípiu pró-ativu no kompetitivu hosi munisípiu seluk.

“Ha’u espera katak ho kompromisu sira ne’ebé iha, hakarak hamutuk ho entidade hotu ne’ebé hala’o nia misaun iha munísipiu Lautém, atu ita kolabora no koopera ba malu nafatin hodi bele eleva ita-nia munisípiu sai munisípiu ne’ebé pró-ativu no kompetitivu atubele aselera no kontribui ba prosesu dezenvolvimentu no sustentabilidade ekonomia nasionál,” Mélio de Jesus, informa ba Agência Tatoli, via telefónika, sesta ne’e.

Nia konsidera konfiansa ne’ebé Governu fó ba nia hodi sai servidór povu iha munisípiu Lautém.

“Ha’u mai ho planu prioridade sira hamutuk lima ne’ebé prepara mai ho slogan ida katak ‘Munisípiu Lautém Hader’. Hader hosi ekonomia, infrastrutura, edukasaun, saúde, agrikultura, turizmu, indústria no seluk tan,” nia akresenta.

Notísia relevante : Tempu besik, MS rezolve falta kombustivél iha servisu saúde Lautem

PAM Lautém hakarak haree ba prioridade hirak ne’e tanba nia konsidera munisípiu ne’e iha istória rasik ne’ebé hakerek iha pájina rezisténsia ba libertasaun nasionál, katak Ponta Leste é Celeiro da Nação ka sai nu’udar armazein no baze lojístika ba rezisténsia nasionál hasoru okupasaun Indonézia, maibé iha tempu ukun rasik-an ba prosesu konstrusaun Estadu, povu munisípiu Lautém taka no sulan-an iha vidru laran hodi hateke de’it ba li’ur iha prosesu dezenvolvimentu libertasaun ba povu.

“Buat hirak ne’e hotu nu’udar dever no responsabilidade morál ida atu kontinua no konkretiza espíritu hosi libertasaun nasionál hodi liberta povu Timor-Leste, liu-liu povu munisípiu Lautém,” nia afirma.

Mélio de Jesus, dehan, povu munisípiu Lautém hotu hatene katak iha dinámika iha prosesu konstrusaun Estadu no dezenvolvimentu nasionál, nune’e dalabarak hasoru dezafiu no obstákulu oin-oin, ne’ebé afeta ba kondisaun bainhira atu aselera dezenvolvimentu nasionál no munisipál.

“Ho nune’e, responsabilidade no kompromisu ne’ebé ha’u simu, katak to’o ona tempu munísipiu Lautém atu aselera dezenvolvimentu liuhosi planu prioridade lima mak hanesan aselera dezenvolvimentu infrastrutura ne’ebé justu, ekilíbriu no sustentável,” nia tenik.

Seluk maka atu hasa’e kampu traballu hodi kria sentru ekonomia kreativu bazeia ba potensialidade suku sira mak hanesan dezenvolve no promove setór agrikultura, turizmu, indústria, arte no kultura.

“Ita mós sei haforsa partisipasaun juventude ne’ebé independente, espesializadu no profisionál, nune’e mós iha partisipasaun ativa ba ekonomia dijitál,” Mélio de Jesus, argumenta.

Aleinde ne’e, PAM Lautém foun hakarak hadi’a atendimentu públiku ne’ebé trasparante, responsivu, kualidade no asesível, inklui hadi’a sosiedade ne’ebé prósperu, umanu no espirituál, defende prinsípiu no valór nasionalizmu, relijiozu, demokrasia, kultura no ambientál.

Mélio de Jesus agradese ba Primeiru-Ministru, Kay Rala Xanana Gusmão, nia konfiansa tomak hodi nomea nia liuhosi proposta Ministru Administrasaun Estatál atu sai nu’udar, PAM Lautém, tuir artigu 21 dekretu-lei númeru 03/2016 redasaun dekretualei númeru 84/2023.

“La haluha mós ha’u fó obrigadu ba Ministru Administrasaun Estatál Tomás Cabral, ne’ebé propoin atan ha’u, hodi okupa kargu Prezidente Autoridade Munisípiu Lautém ho karta referénsia númeru 93/M-MAE/II/2024,” nia salienta.

Vise-Ministru Administrasaun Estatál, Jacinto Rigoberto Gomes de Deus, fó pose ba Mélio de Jesus, nu’udar PAM Lautém, iha loron 05 marsu 2024, hodi substitui Administradór Munisípiu Lautém, Domingos Sávio, bazeia ba despaisu hosi Primeiru-Ministru, 17/GPM/II/2024 loron 16 fevereiru 2024.

Jornalista     : Arminda Fonseca

Editora          : Julia Chatarina

iklan
iklan

Leave a Reply

iklan
error: Content is protected !!