DILI, 05 marsu 2024 (TATOLI)–Diretór Nasionál Administrasaun Lojistíka no Patrimóniu, Ministériu Saúde, Julio dos Santos, hateten iha tempu badak ekipa hosi Servisu Administrasaun Lojístika no Patrimóniu sei distribui kombústivel ba Servisu Saúde munisípiu Lautém hodi fó atendimentu ba pasiente sira.
“Loos duni ita rekoñese ida ne’e pedidu hosi Diretór Lautém agora daudauk iha ita-nia meza, ita halo hela prosesu aprovizionamentu, hotu ita distribui bá munisipiu sira, ita hein semana ida ne’e rezolve no mina to’o iha sira-nia fatin,” nia hateten ba TATOLI, iha Caicoli, tersa ne’e.
Tuir planu Ministériu Saúde nian katak kada fulan-tolu sei distribui gazoel hamutuk litru 2.500 ba Servisu Saúde munisípiu Lautém hodi utiliza ba atende servisu integradu saúde komunitária, klinika movél, no distribuisaun ai-moruk ba postu saúde no sentru saúde sira iha baze.
“Kuandu sira uza mak lato’o fulan-tolu, bele halo pedidu urjente mai fali nasionál, ita fó fali señas ba sira hodi bele foti produtu,” nia dehan.
Iha parte seluk, Diretór Servisu Saúde munisípi Lautém, Anastacio da Cruz, relata ninia parte enfrenta problema falta kombustivél ne’e hahú kedas fulan-kotuk to’o agora nune’e difikulta tebes servisu kliníka movél, distribuisaun ai-moruk no seluk tan.
“Servisu Saúde munisípiu Lautém hapara provizóriu atividade fomigasaun no distribuisaun abate ba aréa afetadu dengue no servisu balun tanba mina laiha liu ona,” Dirijente ne’e hateten ba TATOLI, via telefone.
Kareta multifunsaun sufisiente iha munisípiu hotu
Kona-ba funsionamentu karreta multifunsaun hodi tula pasiente sira iha munisípiu sira inklui Rejiaun Administrativa Espesiál Oé-Cúse Ambeno (RAEOA), Diretór Nasionál Administrasaun Lojístika no Patrimóniu iha Ministériu Saúde, Júlio dos Santos, hateten kada sentru saúde ida iha karreta multifunsaun hodi tula pasiente sira.
“Totál karreta multifunsaun ne’ebé agora sirkula iha teritóriu laran tomak hamutuk 136. Ita distribui la hanesan, ezemplu sentru sira bo’ot iha multifunsaun rua no ki’ik iha ida servisu iha ne’ebá,” nia esplika.
Maibé, husi karreta multifunsaun 136 ne’e, karreta ida husi servisu saúde munisípiu Ermera nian ida maka aat tanba mota lori iha tinan kotuk no agora daudaun para hela iha ofisina nasionál hodi hein prosesu manutensaun ba karreta refere.
“Ida Ermera nian kondisaun aat grave tanba mota lori. Dala ruma media sira mós akompaña. no ita labele hadia. Agora para hela iha ita-nia ofisina Bebora nian, restu ne’e di’ak hela iha kada munisipiu,” nia hatutan.
Kona-ba tarefa operasaun karreta multifunsaun ne’e maka tula profesionál saúde sira bá halo tratamentu saúde ba komunidade sira iha suku, tula pasiente hosi suku ba sentru saúde no halo tranferénsia moras mai servisu ambulánsia sira.
Jornalista: Jesuína Xavier
Editór : Agapito dos Santos
