DILI, 08 Marsu 2024 (TATOLI)–Primeiru-Ministru (PM), Kay Rala Xanana Gusmão, parabeniza feto hotu iha ámbitu selebrasaun loron mundiál feto nian.
“Ohin loron mundiál feto nian, parabéns ba feto hotu-hotu, haka’as-an ba oin ho susesu ba imi hotu nia kontribuisaun iha serbisu saida de’it, konta ho ami mane sira-nia apoia,” Xefe Governu hato’o mensajen ne’e iha Aeroportu Internasionál Comoro, hafoin vizita ofisiál ba Austrália, sesta ne’e.
Xefe Governu dehan, Governu liuhosi Sekretaria Estadu Igualdade kontinua hala’o nia knaar hodi selebra loron feto iha loron 08 marsu, ne’ebé mundu mós selebra hodi rekoñese papél feto nian iha serbisu hotu-hotu.
Notísia relevante : PPN Maria Fernanda Lay felisita feto Timor-Leste
International Women’s Day ka loron mundiál feto mundu selebra iha kada loron 8 marsu, ne’ebé loron ne’e hahú bainhira grupu sira halo asaun pasífiku iha loron 08 marsu 1909, nune’e iha tinan 1911, loron mundiál hahú selebra ho foku iha valór sosiál, kultura, ekonomia no polítika feto nian.
Loron mundiál feto formalmente selebra sai hanesan loron mundiál feto iha 1977 no Organizasaun Nasaun Unida deside sai hanesan selebrasaun mundiál kada tinan hodi luta ba feto nia direitu no luta ba pás mundiál.
Jornalista : Antónia Gusmão
Editora : Julia Chatarina
