Kandidatu traballadór na’in-3.777 iha Viqueque tuir ona teste eskrita
VIQUEQUE, 09 marsu 2024 (TATOLI)-Ekipa Sekretáriu Estadu Formasaun Profesionál no Empregu (SEFOPE), sabádu ne’e, hahú fó teste eskrita ba kandidatura traballadór bá Austrália liuhosi Programa Pacific Austrália Labour Mobility (PALM, sigla inglés) husi munisípiu Viqueque na’in-3777.
“Ohin, ita halo ona teste eskrita ba ita-nia kandidatura traballadór Austrália husi munisípiu Viqueque ho totál kandidatura hamutuk 3.777 maka partisipa ba teste ida-ne’e. Teste eskrita ne’e loron ida de’it, antes ne’e ami planu ba loron rua, maibé eskola oferese sala aula ne’e hamutuk 17, nune’e ita halo teste dala ida de’it”, Diretór Jerál SEFOPE, Carlito Rosário Cabrál, hatete ba jornalista sira, hafoin ramata abertura teste eskrita ba kandidatu traballadór iha Ensinu Báziku Sentrál (EBC-sigla Portugés) 01 Beloi, Viqueque Vila, ohin.
Kritéria liu konkursu servisu mak pontu ezame tenke ho valór totál 50, kandidatu sira tenke resposta loos 25% hafoin liu iha teste eskrita, kandidatu ne’ebé liu iha eskrita sei kontinua ba prosesu intervista.
“Planu ezame ba intervista ami sei hein prosesu teste eskrita ba munisípiu ne’e hotu no halo tan tiha koresaun ba teste eskrita no fó sai rezultadu ezame no taka sai kandidatu sira-ne’ebé nian naran maka ba intervista orál ba konkorente sira”, nia relata.
Nune’e ba teste eskrita ne’e vizilasia husi funsionáriu SEPOFE no akompaña husi autoridade munisípiu Vqueque, servisu edukasaun munisípiu Viqueque iha kada sala ida vizilante na’in ida nune’e totál na’in-17.
Antes ne’e, SEPOFE planu atu envolve mós PDHJ no KAK, maibé kestaun tempu sira seidauk akompaña prosesu teste eskrita. Maibé, hanoin ba oin sei envolve instituisaun parte rua ne’e hodi akompaña atu asesu kualidade no imparsialidade ba prosesu teste ida-ne’e.
Iha fatin hanesan, Sekretáriu munisípiu Viqueque, Teotónio Sarmento da Silva, husu agradese ba SEPOFE tanba loke oportunidade ba Viqueque oan sira hodi ba asesu servisu iha nasaun Austrália.
“Esforsu husi imi (kandidatura) ida-idak ninia atu liu vaga ne’e hodi bá servisu iha Austrália no ba sira ne’ebé la liu labele lakon vontade, maibé kontinua prepara an atu kompete fali bainhira vaga iha fali,” katak sekretariadu ne’e.
Tuir observasaun jornalista Agência TATOLI,I.P iha munisípiu Viqueque nota katak prosesu teste eskríta hahú tuku 08:00 dader no ramata iha tuku 15:00 lokarik.
Iha prosesu teste ne’e situsaun la’o hakmate tanba hetan seguransa másimu husi membru PNTL munisípiu no eskudra lima iha munisípiu Viqueque.
Entretantu, serimónia abertura ba teste eskrita ba kandidatu traballadór Austrália husi Sekretáriu munisípiu Viqueque, no akompaña husi komandante Polísia Nasionál Timor Leste munisípiu Viqueque.
Notísia relevante: SEFOPE Viqueque husu kandidatu traballadór na’in-3.777 prepara aan tuir teste eskrita
Jornalista: Vitorino Lopes da Costa
Editór : Florencio Miranda Ximenes
