DILI, 11 marsu 2024 (TATOLI)—Bankada opozisaun FRETILIN iha Parlamentu Nasionál (PN), husu parte ezekutivu atu kontinua implementa programa Bolsa Hakbiit maibé Vise Ministru ba asuntu Parlamentár, Adérito Hugo da Costa, hateten IX Governu hakarak halo avaliasaun ba programa Bolsa Habiit no programa sira seluk ne’ebé implementa iha Governu anteriór.
Notísia Relevante: MESSK loke vaga 1.000 programa bolsa hakbiit iha tinan 2022
Deputadu FRETILIN, Antoninho Doutel Sarmento, hateten Bolsa Hakbiit ne’e kria hosi Governu anteriór ho nia alvu mak família kbiit laek sira nian oan ne’ebé hakarak eskola iha universidade maibé kbiit la to’o, nune’e ho programa ne’e ajuda sira-ne’ebé hosi tinan 2021 to’o mai 2023 rejista benefisiariu 3.754.
‘’Maibé iha Orsamentu Jeral Estadu tinan ida-ne’e la aloka osan ba programa Bolsa Hakbiit ne’e, maibé ha’u husu IX Governu Konstitusionál atu kontinua programa Bolsa hakbiit ba timoroan sira,” Deputadu FRETILIN, Antoninho Doutel Sarmento, hato’o liuhusi deklarasaun polítika iha reuniaun plenária PN, segunda ne’e.
Deputada CNRT, Cedelízia Faria dos Santos, hateten orsamentu iha tinan 2024 ne’ebé IX Governu koloka ba Fundu Dezenvolvimentu Kapitál Umanu (FDCH, siglá portugés) millaun $16. 4, maibé momentu ne’eba iha diskusaun no votasaun iha PN parte opozisaun vota kontra.
“Orsamentu ne’ebé tau ba bolsa estudu ba ita-nia jerasaun sira iha FDCH, ita-boot sira kontra. Bainhira vota kontra ita-boot sira la preokupa, agora Governu ne’e ezekuta hela. Ha’u haree programa sira-ne’e la’o hela foin mak ita preokupa,” nia dehan.
Deputada CNRT, Maria Gorrumali Barreto, hateten programa IX Governu tinan lima mak hatun ba kada tinan mak bolu planu asaun anuál. Planu asaun anuál ne’e mak Governu aloka orsamentu hodi implementa programa ne’e, ne’ebé programa IX Governu nian aprova iha PN ho unanimidade tiha entaun klaru se nia la tama kestiona kona-ba bolsu Hakbiit, se nia la tama ba programa klaru laiha dalan atu ita krítika.
Governu halo avaliasaun
Vise Ministru ba asuntu Parlamentár, Adérito Hugo da Costa, hateten IX Governu halo avaliasaun hela ba programa sira-ne’ebé uluk iha Governu anteriór implementa hanesan Bolsa Hakbiit, no programa sira seluk tan hanesan parte Uma Kbiit Laek (UKL) ka Uma Naroman ba Povu, obra infraestrutura sira halo avaliasaun hela.
Mezmu nune’e, Governante ne’e la esplika kle’an kona-ba avaliasaun ba programa Bolsa Hakbiit ne’e rasik.
‘’Avaliasaun IX Governu halo ba polítika sira ba subvensaun sira no subsídiu ba estudante sira, faluk sira no UKL. UKL la’ós hapara, UKL IX Governu suspende para atu halo avaliasaun ba benefisiáriu sira ho mós osan ne’ebé alokadu tranfere ona ba to’o munisípiu no suku sira-ne’ebé ninia implementasaun hakdasak hela. Hakarak halo avaliasaun foti fali dadus ho didi’ak kredibiliza subsídiu ne’ebé Estadu fó atravez subvensaun orsamentu Estadu, kredibiliza termu ne’e mak IX Governu uza kuandu suspende UKL,” nia dehan,
Tanba, nia hateten, iha implementasaun UKL ne’e iha tendénsia aumenta númeru benefisiáriu boot, maibé iha prátika implementasaun UKL sira-ne’e problema barak tanba la’ós benefisiáriu ne’ebé troka ba troka mai, maibé konstrusaun hotu la’o ladi’ak, entaun ne’e mak halo avaliasaun hanesan mós obra infraestrutura.
Jornalista : Nelson de Sousa
Editór : Cancio Ximenes
