DILI, 11 marsu 2024 (TATOLI)–Diretór Ezekutivu Fundasaun Klibur Domin Tibar, Joaquim Freitas Soares, hateten iha janeiru no fevereiru ne’e Fundasaun Klibur Domin halo teste diagnostiku ba populasaun iha Liquiça no rejista moras Tuberkuloze (TB) hamutuk 20.
Notísia Relevante: Janeiru-agostu MS deteta moras TB 2.800 iha TL
“Fundasaun Klibur Domin apoia Ministériu Saúde hodi implementa Fundu Globál ne’ebé finansia programa tuberkuloze. Ami agora ba oin servisu de’it iha munisipiu Liquiça, ami espera deteta kazu barak atu bele hapara transmisaun ba komunidade. Ami iha kazu foun kuaze 20”, Diretór Ezekutivu Fundasaun Klibur Domin Tibar, Joaquim Freitas Soares, hatete ba Agência Tatoli hafoin halo diálogu ho tema “Reforsa informasaun servisu entre Ministériu Saúde ho organizasaun Sosiedade sivil hodi lori kualidade servisu saúde ba Timor oan hotu”, iha Salaun Hotel Timor, segunda ne’e.
Nia garante, Klibur Domin mós halo tratamentu prevensaun ba moras TB ba populasaun katak pasiente ne’ebé konfirmadu pozitivu TB iha uma ida, familia sira mós hetan tratamentu ka hemu aimoruk hodi bele evita ba futuru ho moras TB.
Iha tinan kotuk, Klibur Domin implementa programa iha munisipiu tolu hanesan iha Baucau, Liquiça, Viqueque no Ataúro ne’ebé deteta pasiente moras TB 1000-resin.
“Ita deteta moras sira-ne’e iha komunidade area remota ema 1000 resin. Nia tratamentu iha Klibur Domin la’o di’ak no hetan susesu tanba 95% hetan tratamentu kompletu,” nia hateten.
Tuir nia, Klibur Domin mós hala’o atividade seluk mak halo sensibilizasaun hodi hasa’e ema-nia koñesimentu kona-ba saida mak moras Tuberkuloze.
Nia esplika koñesimentu populasaun kona-ba TB mínimu tebes, tanba detesaun liuhosi ekipa Klibur Domin mak ba buka komunidade hanesan estratéjia ida di’ak mak tenke buka komunidade iha terrenu.
Klibur Domin buka no rekolla sampel ba halo teste no hasai Ray-X mak foin deteta no akompaña tratamentu to’o fulan neen ramata.
“Infetadu ho TB ne’e hetan tratamentu entre fulan tolu no neen, ne’ebé 95% hetan rekuperasaun hosi moras TB,” nia dehan.
Jornalista : Jesuína Xavier
Editór : Cancio Ximenes
