DILI, 11 setembru 2023 (TATOLI) – Xefe Programa Tuberkoloze Nasionál iha Ministériu Saúde, Constantino Lopes, hateten hahú janeiru to’o agostu, Ministériu Saúde (MS) deteta ba moras tuberkoloze hamutuk 2.800-resin iha Timor-Leste (TL).
“Husi fulan janeiru to’o agostu, moras TB ne’ebé mak ami deteta iha munisípiu hotu hamutuk 2.800-resin tanba ita haree foin mak metade husi tinan ida ne’e, tanba ita halo kalkulasaun karik tinan ida ita bele deteta 5.000-resin no 6.000-resin tanba kuaze munisípiu ne’ebé mak deklara sira halo escrening makas tebes tanba uluk ita hein fasilidade saúde maibé agora pesoál saúde tama sai komunidade nia uma hodi deteta moras ida ne’e”, Constantino Lopes dehan ba TATOLI bainhira halo entervista eskluziva iha edifisiu TATOLI Farol, ohin.
Nia informa, tuir estimasaun husi MS katak kada tinan tenke deteta kazu to’o 6.000, husi populasaun ne’ebé ho moras tuberkoloze.
“Ita-nia estimasaun lolos ne’e ita tenke deteta kazu to’o 6.000-resin maibé foin mak deteta metade tanba fulan klaran maibé ami buka meiu para oinsa ami deteta kazu sira iha komunidade liuhosi ita-nia intervensaun regirozu atu bele deteta ema sira moras TB hotu ba halo tratamentu saúde”, nia esplika.
Nia afirma, servisu ida ne’e durante Fundu Globál mak apoiu makas ba ida ne’e hanesan apoiu ekipamentu reajente hodi halo diagnosa ba komunidade sira ne’ebé afeta ho moras TB.
“Kona-ba aimoruk tuberkoloze no reajente TB ne’e maioria fundu globál mak sosa no ita-nia Governu apoiu rekursu umanus no infraestrutura para ita bele servisu hamutuk tuir nesesidade ne’ebé mak iha katak médiku espesialista sira koloka tuir iha ospitál referál no nasionál, agora iha postu saúde, sentru saúde mak presiza aumenta médiku jerál sira para fó atendimentu ne’ebé mak di’ak ba populasaun sira liuliu ba moras tuberkoloze nian”, nia subliña.
Tanba ne’e, Governu anteriór da-ualu iha katak ba tinan 2025 tenke elemina ona moras tuberkoloze iha Timor Leste.
Jornalista : Felicidade Ximenes
Editór : Zezito Silva
