VIQUEQUE, 11 marsu 2024 (TATOLI)— Xefe suku Dilór, Postu Administrativu Lacluta, munisípiu Viqueque, Jacinto Ximenes, husu Governu liuhusi Ministériu Obra Públiku (MOP) atu halo reabilitasaun ba estrada husi suku Luka liga ba postu Lacluta ho kilométru 15 atu fasilita movimentasaun ema no transporte.
“Estrada ne’e kondisaun aat loos, nune’e husu ba Governu liuliu Ministériu Obra Públiku hodi halo reabilitasaun estrada ne’ebé husi suku Luka hodi fasilita ita-nia povu liuliu movimentasaun transporte no ema,” Xefe Suku ne’e hatete ba jornalista sira, iha postu administrativu Lacluta, ohin.
Daudaun, nia dehan tempu udan nune’e kondisaun estrada diresaun Viqueque mai postu Laclura grave tebes hodi difikulta transporte karreta no ema sira iha suku Uma Tolu, Dilór, Ahic no suku Laline.
“Kondisaun estrada ne’e aat hahú iha tinan 2017 to’o agora laiha reabilitasaun ba estrada sira-ne’e. Estrada ne’e ami haree sai impedimentu ida ba ami-nia povu ida-ne’e”, nia afirma.
Bainhira, nia dehan Governu halo reabilitasaun ba estrada ne’e bele fasilita agrikultór sira bele asesu produtu lokál sira-ne’ebé hudi, ai-lia, kami, nuu, feuk no seluk tán ba merkadu.
Iha tinan 2005 liu hosi pakote referendu, maibé liu ida-ne’e laiha ona manutensaun ruma ba estrada Diresaun Viqueque mai postu Lacluta.
Iha fatin hanesan, Komunidade Laclura, Anilo Ramos, reforsa kondisaun estrada ida-ne’e grave duni hodi difikulta movimentasaun ema no transporte públiku.
“Kondisaun estrada liga mai ami-nia postu ne’e a’at kleur liu ona, maibé ita-nia Governu seidauk tau ba konsiderasaun. Tan ne’e ami ami husu ba Governu atu tau ba konsiderasaun hodi reabilita estrada ne’e atu movimentasaun transporte no ema bele la’o di’ak,” nia sujere.
Tuir dadús totál populasaun iha postu Lacluta iha 2022 kompostu husi suku haat hanesan Uma-Tolu, Dilór, Ahic no suku Laline hamutuk uma-kain 1.907 no totál abitante na’in-8,123.
Suku Ahik ho totál populasaun 1, 247 kompostu husi aldeia Krarek-Boku, Hali-Oan, Ai-Lo’ok, Hali-Mean no Kai-Wa. Suku Dilor aldeia hamutuk lima kompostu husi Rade-Uman, Aidak-Laran, Boruk, Tula-Oli no Akadirun-Hun ho totál populasaun hamutuk 1.479 (sensu 2010).
Enkuantu suku Laline iha aldeia lima kompostu husi Aimeta-Hun, Fatu-Kadó, Mau-Ama, Mikradek no Santo António ho totál populasaun hamutuk 943 (sensus 2015).
Kontrata ona empreza Jamatil halo reabilitasaun
Responde ba preokupasaun hirak ne’e, Diretór Servisu Obra Públiku (MOP) Munisípiu Viqueque, Mario do Rego, haktuir iha tinan 2023 MOP halo kontratu ho empreza Jamatil Unip, Lda, atu halo normalizasaun, maibé daudaun empreza refere seidauk halo normalizasaun to’o iha postu Lacluta.
“Iha tinan kotuk Governu halo kontratu ba normalizasaun dalan sira husi munisípiu liga Lacluta ho empreza Jamatil, nune’e empreza hahú halo ona normlizsaun hosi munisípiu atu ba iha postu Lacluta”, Diretór ne’e garante.
Daudaun ne’e, empreza Jamatil destaka ona ekipamentu pezadu iha suku Luca nian, nune’e sei halo normalizasaun ba estrada sira-ne’ebé ku’ak hodi fasilita movimentasaun ema no transporte sira.
Notísia relevante:Komunidade Dilor no Luca husu MOP konstrui ponte iha mota Uelolo
Jornalista : Vitorino Lopes da Costa
Editór : Florencio Mirada Ximenes
