DILI, 11 marsu 2024 (TATOLI)–Diretora Rekursu Umanu iha Ministériu Edukasaun (ME), Anita Tavares Ribeiro de Jesus, hateten ME hahú prosesa retroativu ba profesór sira territóriu Timor-Leste iha fulan-marsu tinan ne’e.
Notísia Relevante: Pagamentu retroativu ba profesór 1.715 realiza entre agostu no setembru
Diretora ne’e hato’o kestaun ne’e hodi hatán ba Diretora Eskola Ensinu Báziku Sentrál (EBC), Faról, Filomena Fátima Freitas, neia preokupasaun kona-ba kargu xefia iha EBC Faról seidauk simu subsídiu $75.
“Iha fulan-marsu nia-laran ne’e, ita bele prosesa ona. Konserteza sira-nia retroativu la lakon. Retroativu la lakon, sei halo prosesu pagamentu, tanba ida-ne’e sira nian direitu. Agora, sira simu hela $25, ne’e ba hotu-hotu hanesan maibé atu aumenta de’it ba sira-nia kargu. Sira simu $75, agora sira simu hela $25 maibé $50 ne’e sira tenke simu maibé sei iha prosesu nia-laran,” Diretora hateten ba Agência Tatoli, iha nia kna’ar fatin, segunda ne’e.
Ida-ne’e, sira-nia direitu maibé mós tenke verifika halo didi’ak tanba durante ne’e dadus ne’e ba sira sira nomeasaun de’it, tanba presiza hatene iha ka lae despaisu husi Komisaun Funsaun Públika (KFP) mak foin bele halo pagamentu, enkuantu laiha KFP nia despaixu mak pagamentu sei la halo, mezmu sira iha ne’ebá asume kargu ruma.
“Tanba ne’e ita haree kargu sira-ne’e propoin mai, ita bele enkamiña ba KPF para iha despaixu. Agora ne’e, ekipa sei verifika hela hafoin bele fó sai no halo pagamentu,” nia esplika.
Daudaun ne’e, rekursu umanu husi Ministeriu Edukasaun verifika hela dadus kargu xefia sira-nian ne’ebé atu aumenta subsídiu transporte.
Diretora Ensinu Báziku Sentrál (EBC), Farol, Filomena Fátima Freitas, hateten, kargu xefia sira-ne’ebé hakna’ar-aan iha Eskola Ensinu Báziku Sentrál (EBC, sigla protugés) Faról seidauk simu subsídiu $75 liuhosi retroativu.
“Subsídiu ba kargu xefia sira, hanesan koordenadór, xefe GAT no adjuntu ne’e ami seidauk simu maibé ba transporte $25 nian ne’e, ami hotu-hotu simu ona. Kona-ba subsídiu $75 ne’e ami hasoru imediata hodi ko’alia mak ita-nia rekursu umanu nasionál ne’e hateten katak lais ou kle’ur sei hetan direitu ida-ne’e. Ami sei falta $50,” nia dehan ba Agência Tatoli, iha nia kna’ar fatin, Farol, segunda ne’e.
Kona-ba kargu xefia ne’e, nia dehan, koordenadór, xefe GAT inklui adjuntu ne’e mai ho kedas karta hosi Komisaun Funsaun Públika (KFP) nian la’ós nomeasaun eskola nian.
“Iha eskola ne’e ita iha diretora ida, xefe GAT ida, adjuntu ida inklui koordenadór eskola filiál haat nian ne’e. Hosi totál profesór 53 no mesak permanente maibé ida-ne’e la inklui ho profesór EBC Filiál,” nia dehan.
Jornalista : Osória Marques
Editór : Cancio Ximenes
