DILI, 11 marsu 2024 (TATOLI)–Diretór Servisu Edukasaun Munisípiu Manatuto, Patrício da Cruz Quintão, hateten, orsamentu Programa Merenda Eskolár (PME) ba munisípiu Manatuto millaun $1.033 ne’ebé sei benefísia estudante 13.766.
Notísia Relevante: ME prevee rihun $35 atu superviziona programa merenda eskolár
“Orsamentu PME tinan 2024 nian ne’e, sei aloka ba Eskola Pre-Eskolár (EPE) hamutuk $103.320 no ba Ensinu Báziku (EB) hamutuk $ 929.880,” Patrício da Cruz Quintão hateten ba Agência Tatoli, liuhosi WhatsApp, segunda ne’e.
Estudante ne’ebé sei benefísia hosi PME ba tinan 2024 ne’e ba EPE hamutuk 1.149, Ensinu Báziku hamutuk 12.617, agora totál EPE públiku, privada, fundasaun no komunidade hamutuk 21 no totál EB públiku, katólika, fundasaun no komunidade hamutuk 19.
Merenda eskolár ne’e atu implementa maibé sei iha kestaun balun presiza rezolve ne’ebé ligadu ho grupu EJP, entaun semana oin bele implementa ona merenda eskolár ne’e.
Grupu Ekipa Jestaun Programa (EJP), ba tinan 2024 nian hamutuk 18 no aihan ne’ebé atu fornese ba estudante sira mak produtu lokál sira no ida-ne’e grupu EJP ho inan-aman sira mak jere.
Entretantu, Eskola Sekundáriu Jerál (ESJ) públiku hamutuk tolu (3) no privadu haat (4) ne’e ho totál estudante hamutuk 2.613 no Eskola Sekundáriu Tékniku Vokasionál (ESTV) iha tolu (3) ho totál estudante hamutuk 243.
Jornalista : Osória Marques
Editór : Cancio Ximenes