DILI, 11 marsu 2024 (TATOLI)—Parlamentu Nasionál (PN) liuhusi Prezidente Komisaun C trata asuntu Finansa Públika, Deputada Cedelízia Faria dos Santos, preokupa ho ezekusaun Orsamentu Jerál Estadu (OJE) 2024 ne’ebé to’o ona fulan-marsu nia klaran maibé foin atinje 4,9%.
Notísia Relevante: PN aprova proposta-lei OJE 2024 iha finál globál ho votu a-favór 41
Deputadu Cedelízia fó hanoin ba Vise Ministru ba asuntu Parlamentár atu hato’o hela ba Ministéiru Finansa (MF), tanba nia-parte akompaña iha portál transparánsia semana kotuk liubá, ezekusaun OJE 2024 sa’e tiha ona 6% maibé tekir-tekir ohin haree fali ezekusaun ne’e tun tiha fali ba 4,9%.
Nia hateten, se iha data ruma mak hatama sala iha ne’eba se bele karik erru hanesan ne’e labele mosu beibeik.
“Ha’u mós preokupa fulan-marsu to’o klaran ona ezekusaun foin tun tiha fali ba 4,9% ne’e kiik-oan, hanesan maske bankada Governu maibé fó hanoin malu ne’e presiza,” nia levanta liuhosi reuniaun plenária PN, segunda ne’e.
Vise Ministru ba asuntu Parlamentár, Adérito Hugo da Costa, hateten utiliza fulan-janeiru no fevereiru ne’e hodi halo preparativu tékniku ba ezekusaun OJE 2024, nune’e inísiu fulan-marsu foin hahú prosesu ezekusaun.
Antes ne’e, iha 20 dezembru 2023, PN liuhosi reuniaun plenária, aprova proposta lei númeru 4/VI (1a) Orsamentu Jerál Estadu (OJE) 2024 ho montante billaun $1,95 iha finál globál ho votu a-favór 41, kontra 23 no abstensaun zero (0).
“Ne’ebé, proposta OJE 2024 iha finál globál pasa,” Prezidente Parlamentu Nasionál, Maria Fernanda Lay, fó sai iha sala plenária iha PN.
Proposta-Lei OJE 2024 ne’ebé Governu aprezenta ho montante konsolidadu biliaun $1,95 ba Administrasaun Sentrál, RAEOA no Seguransa Sosiál, sein Fundu Rezerva Seguransa Sosiál.
Hosi montante ne’e, fahe ba kategoria saláriu no vensimentu saláriu no vensimentu, bens no serbisu millaun $386,3, transferénsia públika millaun $589,7, kapitál menór millaun $34,2 no kapitál dezenvolvimentu millaun $411.
Orsamentu Seguransa Sosiál inklui Fundu Rezerva Seguransa Sosiál hetan alokasaun millaun $347,6.
Prevee mós ba asuntu ekonómiku millaun $788,2, protesaun sosiál millaun $467,1, edukasaun millaun $140,9, saúde millaun $66,2 no abitasaun no infraestrutura koletiva millaun $45,2.
Notísia Relevante: PR Horta promulga ona OJE 2024 billiaun $ 1.95.
Jornalista : Nelson de Sousa
Editór : Cancio Ximenes
