DILI, 11 marsu 2024 (TATOLI)–Koordenadór Jerál Rede ba Saúde Timor-Leste (REBAS-TL), Joaquim Freitas Soares, husu IX Governu Konstitusionál atu kria laboratóriu ba teste aihan importadu iha Timor-Leste.
Notísia Relevante: Reprezentante povu husu investe laboratóriu teste produtu importasaun
“Ita Timor-Leste seidauk iha laboratóriu própriu atu halo teste ka kontrolu aihan importadu. Ita Timor ne’e ki’ak ona ho 42% la muda, tanba ki’ak ba edukasaun no saúde no kondisaun moris,” Koordenadór Jeral REBAS-TL, Joaquim Freitas Soares, hateten diálogu ho Governu ho tema “Reforsa Informasaun Servisu entre Ministériu Saúde ho Organizasaun Sosiedade sivil hodi lori kualidade servisu saúde ba Timor oan hotu”, iha Hotel Timor, segunda ne’e.
Nia dehan, nasaun seluk importa aihan mai tama Timor-Leste maibé Timor-Leste laiha mekanizmu kontrolu bele estraga ema-nia saúde, ema mate ba moras naunkontajioza mós barak hanesan kankru, tensaun alta no kardiovaskulár.
Governu tenke kontrolu ba aihan sira atu povu labele sai vítima ba dezafiu sira-ne’ebé iha nasaun ne’e.
Ho preukupasaun ida-ne’e, reprezentante MS Adelia Maria Moniz Barreto hateten, atu kontrola aihan importadu ne’e responsabilidade Ministériu kompetente hotu ka liña ministeriál nian.
“Pelu menus Ministériu Agrikultura no Peska, Autoridade Inspesaun no Fiskalizasaun Atividade Ekonómika, Sanitaria no Alimentar haree hamutuk atu ita iha laboratorariu nasionál ida ba halo teste ba hotu-hotu. Tanba, problema saúde la’ós de’it hosi aihan maibé liuhosi mos importasaun animal,” Adelia Maria Moniz Barreto hateten.
Nia hateten, atu garante kualidade aihan no garante saúde ba ema hotu ne’e la’ós responsabilidade Ministériu Saúde de’it maibé komponente hotu-hotu.
Jornalista : Jesuína Xavier
Editór : Cancio Ximenes
