SEFOPE realiza ona teste lian inglés ba kandidatu traballadór iha munisípiu hitu
DILI, 11 marsu 2024 (TATOLI)– Sekretaria Estadu Formasaun Profisionál no Empregu (SEFOPE), Diresaun Nasionál Empregu Estranjeiru (DNEE) realiza ona teste eskrita lian inglés ba kandidatu traballadór sira iha munisípiu hitu.
Munisípiu hitu ne’e mak hanesan Rejiaun Administrativa Espesiál Oé-cusse-Ambeno (RAEOA), Aileu, Ainaro, Manufahi, Covalima, Baucau no Viqueque.
“Realizasaun ezame ba kandidatu traballadór sira iha lian Inglés. Ami halo ona etapa dala tolu ne’ebé hahú hosi Oé-cusse, no horseik (domingu) foin finaliza ba munisípiu rua tan (Baucau no Viqueque)”, Diretór DNEE, João Correia Pereira, hateten ba jornalista sira, bainhira halo abertura ba rejistu kandidatu traballadór Koreia, iha Jináziu Dili, segunda ne’e.
Dirijente ne’e haktuir, durante realiza ezame ne’e ekipa sira lahasoru difikuldade ruma tanba maioria joven sira ne’ebé naran iha sira informadu ona.
“Sira (kandidatu) kontente partisipa iha ezame ne’e tanba sira dehan hein kle’ur tebes ona ba teste ida-ne’e, depois ho kooperasaun tomak hosi parte hotu hanesan seguransa no autoridade munisipál”, nia dehan.
Munisípiu ne’ebé seidauk maka Manatuto, Lautém, Liquiça, Ermera, Bobonaro no Dili. Iha semana ne’e kontinua ba Ermera no Liquiça.
Notísia relevante : https://tatoli.tl/2024/03/04/sefope-klarifika-materia-teste-ba-kandidatu-traballador-australia-kada-munisipiu-diferente/
Jornalista : Antónia Gusmão
Editór: Rafael Ximenes de A. Belo
