OÉ-CUSSE, 12 marsu 2024 (TATOLI) – Vincencio Cono, hetan fiar hosi Autoridade Rejiaun Administrativa Espesiál Oé-Cusse Ambeno (RAEOA) liuhosi Sekretária Rejionál ba Asuntu Edukasaun no Solidariedade Sosiál, nu’udar Diretór lidera Diresaun Edukasaun Rejionál Oé-Cusse ba mandatu tinan lima, 2024 to’o 2028.
Vincencio Cono, antes ne’e asumi kna’ar nu’udar Diretór Eskola Bázika Sentrál (EBC, sigla portugés) Palaban 01 de Maio, no iha 2022 hetan transferénsia hosi Autoridade ba Eskola Bázika Filiál (EBF) Nefomtasa, Suku Ban-Afi, sub-rejiaun Nítibe.
Notísia relevante: Inácia Tamele prioriza programa haat hodi hadi’a kualidade edukasaun Oé-Cusse
Iha serimónia hand over, hala’o iha salaun Edukasaun Oé-Cusse, Vincencio Cono, promete, sei servisu hamutuk ho departamentu hotu iha diresaun edukasaun, leal ba dirijente másimu iha Autoridade RAEOA, atu garante atendimentu iha públiku edukasaun nian.
“Konfiansa ida-ne’e la’ós oportunidade mai ha’u maibé nu’udar responsabilidade boot mai ha’u, no ha’u mós la’ós ema foun, ha’u ema edukasaun duni, ne’ebé ha’u sei koopera ho departamentu sira hotu atu ita hamutuk hadi’a Diresaun Edukasaun Oé-Cusse, tanba servisu atu la’o ho susesu, tenke hamutuk atu fó hanoin ba malu,” Vincencio Cono, ko’alia iha ámbitu serimónia hand over iha salaun edukasaun Oé-Cusse, tersa ne’e.
Nia fundament,a konfiansa ida ne’e, la’ós oportunidade maibé hanesan responsabilidade ida ba lideransa foun atu kontinua servisu ne’ebé diretór sesante husik hela,.
Tan ne’e, nia promete, sei koopera ho xefe departamentu sira hotu, atu kontinua programa prioridade sira, ne’ebé lideransa sesante planeia ona, presiza kontinua tanba hanesan programa sustentabilidade.
“Ne’ebé, ohin ha’u simu ona relatóriu sira, aban ha’u sei konvoka enkontru ho departamentu hotu atu fahe servisu, hahú hosi inspetór eskolár sira, funsionáriu no xefe departamentu hotu, tanba Estadu selu ita atu servisu, ita tenke servisu,” nia katak.
Iha fatin Diretór Sesante, Daniel Mauno, espera, iha futuru mantein koordenasaun, tanba iha Diresaun Edukasaun akumula departamentu barak, kooperasaun ne’e importante, intermu ho parsériu dezenvolvimentu sira.
“Ha’u agradesu tanba durante ha’u-nia mandate, ita halo ona buat barak, agora ba oin importante maka servisu hamutuk, unidade liuhosi liña koordenasaun, sei ita la hamutuk, ohin loron mídia sosiál barak, ema sei hakilar ita, tanba de’it servisu ita-nian, enatun liuhosi koordenasaun makai ta bele lori servisu edukasuan ne’e ba oin,” nia fó hanoin.
Entretantu, Daniel Mauno, asume kargu nu’udar Diretór Rejionál Edukasaun, hahú kedas iha 2015 no termina ona iha marsu 2024 ne’e, troka hosi Vincencio, nu’udar funsionáriu públiku no Eis-Diretór EBC Palaban 01 de Maio.
Jornalista: Abílio Elo Nini
Editór: Evaristo Soares Martins
