OÉ-CUSSE, 15 fevereiru 2024 (TATOLI) – Sekretária Rejionál ba Asuntu Edukasaun no Solidariedade Sosiál, Inácia Tamele, prioritiza programa haat iha 2024 ne’e, hodi implementa atu hadi’a kualidade edukasaun iha Rejiaun Administrativa Espesiál Oé-Cusse Ambeno (RAEOA).
“Primeiru ha’u tenke kolleta dadus depois ida-ne’e, ha’u tenke hatuur manorin sira tuir sira-nia área edukasaun nível akadémiku nian, ne’e programa dahuluk atu halo maka ida-ne’e, katak profesór tenke iha nível akadémiku ba área edukasaun,” Inácia Tamele, ba jornalista sira iha Oé-Cusse, kinta ne’e.
Notísia relevante:Edukasaun Oé-Cusse apoia livru istória ba estudante CAFE
Programa daruak, tenke haree no vizita eskola sira hotu iha territóriu Oé-Cusse, atu haree infraestrutura sira, tanba bainhira atu hadi’a kualidade ensinu aprendizajen fatór ida maka infraestrutura tenke apoia.
“Infraestrutura tenke kompleta ho biblioteka, nune’e bainhira hetan lisaun iha sala aprendizajen to’o tempu ezersísiu, estudante tenke vizita biblioteka, tenki lee, tanba lee hanesan janela ba mundu, entaun estudante sira tenke lee barak, maske agora ita tama ona era dijitalizasaun maibé lee livru mak importante,” nia hateten.
Programa datoluk, maka kapasitasaun ba manorin sira, tanba liuhosi kapasitasaun rekursu umanu maka garante kualidade ensinu aprendizajen.
“Ida-ne’e ha’u-nia planu, katak profesór sira presiza hetan formasaun naun-formál, nune’e bele hanorin ita-nia oan sira sai matenek,” nia katak
Programa ikusliu maka, sei kontinua identifika estudante sira-ne’ebé maka abilidade hakerek, kona-bá opiniaun, istória artigu ruma, puízia no kreativu seluk tán, autoridade tenke fó rekoñesimentu ba idea sira-ne’e.
“Entaun estudante sira tenke komesa agora hahú depois to’o tinan ikus, maka ita haree no avalia, sé mak nia hakerek ne’e di’ak ita bele prodús sai livru ida, ita sei halo iha 2024 ne’e,” nia fó-sai.
Notísia relevante: RAEOA prevee rihun $245-resin reabilita EBF hitu no konstrusaun rua
Entretantu, tuir dadus ne’eb’e prevista iha livru 3C RAEOA no ZEESM-TL, hatudu setór edukasaun dadús setembru 2021, katak, estudante eskola iha eskola públiku hahú hosi pré-primária to’o ensinu tékniku vokasionál hamutuk 22.441 ho totál profesór hamutuk 708, permanente 409 no kontratadu 299.
Nune’e mós estudante ne’ebé eskola iha eskola kátolika hahú hosi infantíl ensinu báziku to’o ensinu tékniku hamutuk 2.854 ho totál profesór hamutuk 84, permanente 49 no kontratadu 35.
Kona-bá fasilidade iha eskola públiku no privada provisória hamutuk 100 ho sala de aula iha 799, ho totál profesór hamutuk 794, permanente 458 no kontratadu 336, ho totá estudante hotu iha territóriu O’e-Cusse hamutuk 25.496.
Notísia relevante: Investimentu ensinu pré-eskolár hosi nível aldeia sai prioridade ba Autoridade RAEOA
Jornalista: Abílio Elo Nini
Editór: Evaristo Soares Martins
