DILI, 12 marsu 2024 (TATOLI)—Deputada hosi bankada CNRT iha Parlamentu Nasionál (PN), Cedelízia Faria dos Santos, husu IX Governu konstituisionál atu halo auditoria ba ponte Becuse iha Dili, ne’ebé antes ne’e iha Governu anteriór sobu.
Notísia Relevante: Konstrusaun ponte Bekusi foun la inklui iha programa IX Governu
Nia hateten, ponte Becuse ne’ebé liga estrada ne’ebé pasa ba semitériu Because ne’ebé sobu hosi Ministru Obra Públika (MOP) iha VIII Governu Konstitusionál ne’e, maibé iha Orsamentu Jerál Estadu (OJE) 2024 la inklui iha IX Governu Konstitusionál nia planu no verba ba rekonstrusaun ba ponte refere.
“Solisita ba atuál Governu atu halo auditoria ida hodi bele apura razaun motivu destroesaun ponte. No solisita mós ba CAC halo prosesu investigasaun kona-ba matéria ne’e,” nia levanta liuhosi reuniaun plenária PN, tersa ne’e.
Nia husu atu hatene razaun destroesaun ponte no husu inisiativa ba IX Governu Konstituisionál konsiderasaun verba ba planu rekonstrusaun ponte refere no evita desizaun partisipa ignora kestaun téknika hosi kualkér Governu iha futuru.
Hatán ba kestaun ne’e, Vise Ministru ba asuntu Parlamentár, Adérito Hugo da Costa, hateten nakait ho ponte Becuse, Governu liuhosi Ministériu Obra Públika (MOP) halo hela andamentu ba pontu situasaun ne’e hodi fó kontinuasaun ba konstrusaun foun.
“Purtantu, la fó kulpa ba parte seluk maibé IX Governu KOnstitusionál kontinua fó konsiderasaun nesesidade konstrusaun ponte foun iha Becuse hodi fasilita movimentu transporte iha kapitál Dili,” nia dehan.
Jornalista : Nelson de Sousa
Editór : Cancio Ximenes
