DILI, 12 marsu 2024 (TATOLI)–Reprezentante Vatikanu iha Timor-Leste Núnsiu Apostóliku. Monseñor Marco Sprizzi, konsidera Governu Timor-Leste gasta orsamentu millaun $12 hadi’a infraestrutura atu simu Papa Francisco nu’udar obra ida permanente ba povu Timor-Leste.
Notísia Relevante: Governu autoriza despeza to’o millaun $12 ba preparasaun vizita Papa Francisco
“Gastu sira-ne’ebé akontese la’ós de’it ba iha vizita Papa Francisco nian maibé gastu sira-ne’e nu’udar obra ida-ne’ebé sei hela permanente ba Timor no povu tomak. Se alarga estrada ida la’ós okaziaun ba vizita de’it maibé hanesan estrada ida hela ba povu,” Reprzentante Santa Sé ne’e hateten ba jornalista sira hafoin hala’o enkontru ho prezidente konsellu islamiku no membru sira seluk no reprezentante balun, iha Embaixada Santa Sé iha Motael, tersa ne’e.
Se hadia aeroporto ida, nia dehan, la’ós de’it ba vizita Papa Francisco nian maibé ne’e atu aselera ninia prosesu no ida-ne’e ba dezenvolvimentu Timor-Leste nian.
Tuir planu, sei reabilita Katedral Immacukada Conceição Vila Verde, tanba ida-ne’e ba ema rihun ba rihun liuliu sarani sira sempre partisipa iha selebrasaun misa iha Katedral, tanba ne’e mak gastu sira-ne’e ba timoroan sira no ne’e sei hela ba nafatin.
Ba gastu orsamentu hirak ne’e, la’ós buat ida pasajeira no laiha rezultadu, maibé ne’e buat hotu ne’ebé hela ba dezenvolvimentu Timor.
Nia konsidera, preparasaun Governu no igreja adekuada tebes, tanba ne’e mak ekipa de traballu apresia tebes, bainhira iha janeiru kuandu mai halo vizita no enkontru ho Governu no igreja iha fulan janeiru.
Nune’e, nia apela ba sarani katólika no povu timoroan hotu atu bele halo mós orasaun ba Papa Francisco atu nia bele hala’o nia vizita iha Timor-leste ho susesu boot ba povu timorense.
Governu liuhosi reuniaun Konsellu Ministru aprova ona orsamentu hamutuk millaun $12 ba preparasaun kona-ba vizita Papa Francisci nian mai Timor-Leste iha tinan ida-ne’e.
Jornalista : Jesuína Xavier
Editór : Cancio Ximenes
