iklan

COVALIMA, HEADLINE

JSMP disemina informasaun oinsá asesu justisa ba komunidade iha aldeia Bonuk

JSMP disemina informasaun oinsá asesu justisa ba komunidade iha aldeia Bonuk

JSMP disemina informasaun oinsá asesu justisa ba komunidade iha aldeia Bonuk. Imajen/Celestina Teles.

COVALIMA, 12 marsu 2024 (TATOLI) – Organizasaun Naun-Governametál Judicial System Monitoring Program (JSMP) disemina informasaun kona-ba oinsá asesu ba justisa nasionál liuhusi Programa Apoiu Seguransa Komunitária (PASK) ba abitante iha aldeia Bonuk, suku Labarai, iha Covalima.

Investigadór legál JSMP, Adolfo Soares, hatete sensibilizasaun ba informasaun ne’ebé JSMP halo ne’e dezde 2023 iha suku Ogues, postu Maucatar no kontinua iha suku Labarai, postu Suai no suku Maudemo, postu Tilomar nian.

“Bazeia ba asina akordu iha klauzula ida ko’alia kona-ba diseminasaun informasaun ba lei no direitu ba komunidade. Atividade ohin hanesan kumprimentu ba ami-nian akordu ne’e”, Adolfo Soares hatete iha ámbitu atividade diseminasaun iha Labarai, ohin.

JSMP sensibiliza informasaun sobre justisa hanesan parte ida atu hasa’e komunidade iha nivél aldeia nia koñesimentu oinsá bele hatene prosesu bainhira akontese kazu ruma iha aldeia bá iha área justisa formál no justisa nasionál nian.

Nia esplika katak JSMP nia prezensa atu monitoriza kazu iha nivél suku no ajuda hodi konfirma kazu sira husi suku Labarai lori bá iha tribunál hafoin informa fali ba komunidade, tanba durante ne’e sira lori kazu bá iha tribunál, maibé lahatene nia andamentu.

Iha sensibilizasaun ne’e JSMP fahe máteria sira hanesan ko’alia direitu, violénsia bazeia ba jéneru, tanba durante ne’e tribunál rejista númeru kazu violénsia aas liu, maka ho sensibilizasaun informasaun ba komunidade bele komprende nune’e bele halo prevensaun.

Durante fahe informasaun, Adolfo Soares observa katak populasaun sira entuziazmu tebes atu rona, tanba sira husu pergunta maioria sobre violénsia doméstika, kazu abandona oan, maibé sira lahatene nia prosesu maka ho prezensa JSMP nia bele tulun sira oinsá lori ba iha Ministériu Públiku no to’o tribunál.

Tuir estatístika 2023, JSMP rejista kazu hamutuk 500-resin, husi númeru ne’e violénsia bazeia ba jéneru mak 300-resin no nia prosesu sira iha hotu ona desizaun.

Partisipante Noberto Amaral sente satisfeitu ho programa JSMP nian hodi divulga informasaun kona-ba oinsá lori presesu kazu bá iha tribunál, liuliu kazu abandona labarik, violénsia bazeia ba jéneru, nomós kazu violénsia doméstika.

“Disemina informasaun ba ami loron ida de’it la sufisiente no presiza aumenta nune’e ami bele iha koñesimentu ne’ebé di’ak bainhira akontese kazu ruma bele lori prosesu bá iha tribunál”, nia sujere.

Xefe Suku Labarai, Paulo de Sena, realsa katak dalabarak komunidade iha aldeia Bonuk enfrenta hela problema hirak ne’e, maibé lahatene nia prosesu. “JSMP disemina informasaun kona-ba oinsá atu asesu ba justisa nasionál, ha’u rasik mak rekomenda no ohin loron sira hala’o programa refere nune’e sira iha koñesimentu atu hato’o keixa”, nia reforsa.

Notísia relevante: JSMP husu PN altera kódigu sívil rekoñesimentu kazamentu ba relijiaun seluk

Jornalista: Celestina Teles

Editora: Maria Auxiliadora

iklan
iklan

Leave a Reply

iklan
error: Content is protected !!