DILI, 12 marsu 2024 (TATOLI) – Eskla Sekundáriu Tékniku Vokasionál (ESTV) Koléjiu Dom Bosco Maumali-Maliana hetan fundu $6.527 husi Ministériu Agrikultura, Pekuária, Peska no Floresta (MAPPF) atu implementa programa haki’ak ikan.
Responsavel grupu haki’ak ikan, Marçal Lopes, relata katak sira simu ona osan husiMinistériu Agrikultura atu konstrui fatin ka tanke haki’ak ikan, maibé tanba situasaun klimátika iha Maliana kontinua udan, entaun seidauk bele realiza.
“Foin ba dahuluk ami koko atu haki’ak ikan, maibé loloos ne’e ami hadi’a ona kolam sira atu haki’ak ikan, tanba udan la fó fatin, entaun ami seidauk hahú halo tanke ba ikan sira”, responsavel ne’e hatete, ohin.
Nia dehan intensaun husi atividade haki’ak ikan ne’e atu tulun estudante 110 ne’ebé agora iha hela iha koléjiu Dom Bosco Maumali, tanba iha fatin ne’e atividade estra barak loos, entaun estudante sira presiza konsome hahán ne’ebé nutritiva hodi bele dezenvolve sira-nian kakutak.
Marçal Lopes salienta katak verba ne’ebé eskola simu ona ne’e sei aloka duni ba konstrui tanke sira no tuir planu sei halo uluk rua depois mak aumenta iha futuru karik presiza. Ikan ne’ebései haki’ak maka Nila no ikan Mas. “Ikan sira ne’e sei fornese de’it ba estudante sira, signifika koléjiu sei lahalo negósiu hodi lori bá fa’an iha merkadu, tanba objetivu koléjiu nian mak atu fornese ba estudante sira”, dehan.
Diretór Nasionál Akikultura, Fidelino Marques, haktuir katak daudaun ne’e iha ona grupu haki’ak ikan hamutuk 23 mak eziste, inklui ida husi ESTV Dom Bosco Maliana nian. “Sira mós iha planu atu haki’ak ikan, tanba ne’e diresaun ninia ekipa bá survey ona fatin sira ne’e no konsidera sira merese duni atu halo kolam ba ikan sira. Ita apoia ona fundu no sira mak sei jere depois hato’o relatóriu mai diresaun kona-ba ezekusaun ne’ebé sira hetan. Kada fulan tolu sira tenke submete relatóriu mai ita”, dirijente ne’e salienta.
Diresaun kontinua husu ba grupu sira atu ezekuta verba sira ne’e ho responsabilidade, nune’e bele hetan konfiansa husi ministériu atu iha futuru nafatin hetan apoiu.
Notísia relevante: Grupu Haburas Bidaok simu apoiu finanseiru rihun $3-resin husi MAPPF
Jornalista: Tomé Amado
Editora: Maria Auxiliadora
